Бу сыл ахсынньы 4 күнүгэр Чөркөөххө П.А.Ойуунускай аатынан Судаарыстыбаннас түмэлигэр Олоҥхо декадатын түмүктүүр дьоро күн ыытылынна. Маны сэргэ бу күн Чөркөөх олохтооҕор, ЮНЕСКО стипендиата, Ийэ олоҥхоһут П.Е.Решетников-Көһөҥө Бүөтүргэ аналлаах быыстапка көрдөрүүгэ туруорулунна.

Тэрээһиҥҥэ Октябрьскай нэһилиэк баһылыга А.П.Семенов, Ийэ олоҥхоһут П.Е.Решетников-Көһөҥө Бүөтүр төрөппүт кыыһа Р.П.Докторова кыттыыны ыллылар.

Ол курдук бу күн биир дойдулаахпыт Ийэ олоҥхоһут П.Е.Решетников-Көһөҥө Бүөтүргэ аналлаах «Сыыйылла хара сүүрүк олоҥхо атын мииммит Ийэ олоҥхоһут» диэн ааттаах  быыстапка аһыллыыта ыытылынна. Олохтоох культура ситимин үлэһиттэрэ музей быыстапкатын байытан, дириҥэтэн   Көһөҥө Бүөтүр аатын үйэтитэр «Көһөҥө-ситим» фольклорнай бөлөх 5 сыллаах айар үлэтин көрдөрөр, кэпсиир сэргэх тэрээһин тэҥинэн буолла.

Быыстапкаттан быһа тардан ыллахха, манна  Көһөҥө Бүөтүр 2005 сыллаахха Ийэ олоҥхоһут аатын ылбыт, ЮНЕСКО стипендиата буолбут үөрүүлээх тэрээһинигэр кэппит сахалыы таҥаһа, сиэнэ Александра холустаҕа түһэрбит мэтириэтэ, туттубут маллара, кинигэлэрэ көрдөрүүгэ тураллар. Быыстапканы музей специалиһа О.В.Жерготова, онтон И.Я.Жерготова Көһөҥө Бүөтүр туһунан иһирэх ахтыыны оҥорон тэрээһини киэҥник сырдаттылар. Маны таһынан  «Аленушка» оҕо уһуйаана уонна Чөркөөх олохтооҕо, норуот маастара А.А.Гуляева олоҥхо геройдарынан  оҥорбут куукулалара  быыстапканы байытан, ситэрэн-хоторон биэрдилэр.

Бу күн үөрүүлээх быһыыга-майгыга Ийэ олоҥхоһут Көһөҥө Бүөтүр аатын үйэтитэр «Көһөҥө-ситим бөлөх» фольклорнай бөлөх салайааччыта М.П.Яковлева биэс сыллаах үлэтин чөмчөтөн Чөркөөхтөөҕү норуот айымньытын дьиэтин специалиһыгар Туйаара Яковлеваҕа салгыы сайыннарарыгар, кэскиллээхтик үлэлэтэригэр анаан истиҥ баҕа санаатын этэн туран туттарда. Онтон «Көһөҥө-ситим» чилиэнигэр В.Ф.Ефремовка бу күн нэһилиэк алгысчыта буолар  үтүө тыллар эмиэ ананнылар.

 Тэрээһин саамай күүтүүлээх өрөгөйүнэн  «Көһөҥө – ситим» бөлөх «Аһыныгас санаалаах Айыы Дьураҕастай Бухатыыр» олоҥхото  толорулунна.

Бу курдук, тыа сиригэр культура салаата уонна музей кыттыгастаах тэрээһиннэри ыытыы нэһилиэнньэ олохтоохторугар бары өттүнэн табыгастаах, сырдатар үлэ ис хоһооно кэҥиир, дириҥиир.

С.Халгаева