Соторутааҕыта, Мэхээлэйэп таҥара күнүгэр күн сирин көрбүт, Өрөспүүбүлүкэ бочуоттаах гражданина, борокуруор, сахалартан бастакы юридическэй наука доктора, профессор, Аҕа дойду сэриитин кыттыылааҕа, Кыһыл Сулус, Аҕа дойду сэриитин 1-кы степеннээх орденнарын кавалера, Саха АССР наукаларын үтүөлээх деятелэ, Дьокуускай куорат, Алдан, Таатта улуустарын бочуоттаах гражданина, Саха сиригэр Үрдүкү юридическэй үөрэхтээһини олохтообут, Өрөспүүбүлүкэ Төрүт сокуонун оҥорсубут, биир дойдулаахпыт, генерал-майор Михаил Михайлович Федоров төрөөбүтэ 100 сылыгар аналлаах “Борокуруор Мэхээлэ Федоров” диэн ааттаах быыстапка Чөркөөхтөөҕү Государственность түмэлигэр аһылынна.

Быыстапка аһыллыытыгар Октябрьскай нэһилиэк баһылыга А.П. Семенов, “Утум” бэтэрээн учууталлар түмсүүлэрэ, оскуола оҕолоро сырыттылар. Нэһилиэк баһылыга А.П. Семенов “Бүгүн саха саарына, киэн туттар биир дойдулаахпыт олоҕун 100 сыллаах кэрчигин көрдөрөр, кэпсиир быыстапкаҕа кэлэн турабыт. Кини олоҕо ыарахан кэмҥэ ааспыта. Эдэр сааһа Аҕа дойду Улуу сэриитигэр түбэспитэ. Алаас уола саҥа аһыллыбыт юридическэй оскуолаҕа киирэн үөрэнэн оччотооҕу кэм саҥа идэтигэр суолу тэлэн үөрэммитэ. Аҕа дойду Улуу сэриитин кыттыылааҕа, сэрии кэннинээҕи бары өттүнэн сатарыйбыт дойдуну сүһүөҕэр туруорарга күүһүн-уоҕун, сыратын-сылбатын биэрбитэ.

Өрөспүүбүлүкэбитигэр юридическэй үөрэх аһыллыытыгар кылаатын киллэрбит, 1990-с сылларга Төрүт сокуоннарга уларытыылары киллэрэргэ быһаччы үлэлээбитэ. Онон биир киһиэхэ тиксэр улахан олоҕу олорбута», – диэн тоһоҕолоон бэлиэтээтэ.

Салгыы быыстапканы түмэл научнай сотруднига И.Я. Жерготова иилээн-саҕалаан ыытта. Биир дойдулаахтарын туһунан «Утум» бэтэрээн учууталлар түмсүүлэриттэн П.Ф. Кычкина, В.Ф. Решетникова, Е.И. Аржакова урут улаханнык биллэ илик сонун түгэннэрин кэпсээтилэр. Быыстапкаҕа Михаил Федоров тус малларын таһынан, дьиэ кэргэн улахан сылабаара болҕомтону тарта.

С. Халгаева