Бу күннэргэ Таатта улууһугар «Кэскил» уонна «Чуораанчык» оҕо-аймах хаһыата, өҥнөөх сурунаалын айар үлэһиттэрэ, кинилэри кытары РФ суруналыыстарын сойууһун чилиэнэ, идэтинэн оҕо бырааһа С.В.Тарасенко ыалдьыттыыллар.

Светлана Тарасенко оҕолорго аналлаах хас да кинигэ автора. Онон оҕо айар кыһалары кытары биир соруктаах-сыаллаах сылдьаллар. Нэһилиэктэргэ оскуола үөрэнээччилэрин кытары көрсүһүү, сэһэргэһии, оҕо уһуйааннарын үлэтин-хамнаһын билсии. Ыалдьыттар бастакы күн Чөркөөххө сырыттылар. Өрөспүүбүлүкэҕэ биллэр аһаҕас халлаан анныгар турар политссыылка уонна өрөспүүбүлүкэ бастакы салайааччыта П.А.Ойуунускай аатынан Судаарыстыбаннас түмэллэригэр тохтоон, сэргээн көрдүлэр. Ол курдук Судаарыстыбаннас түмэлигэр сарсыардаттан олохтоох «Аленушка» уһуйаан коллективын быыстапкатын, орто оскуола үөрэнээччилэрин кытары көрсүһүү тэрилиннэ. Көрсүһүүнү улуус баһылыгын социальнай боппуруоска солбуйааччы И.А.Сивцева иилээн-саҕалаан ыытта. Онон оҕолору кытары аһаҕастык, атах-тэпсэн олорон сэһэргэһии түһүлгэтэ олохтонно.

Салгыы ыалдьыттар П.А.Ойуунускай уонна Д.К.Сивцев-Суорун Омоллоон төрөөбүт алаастарыгар сылдьан, онно баар мемориальнай комплекстарга сүгүрүйдүлэр. Аара айаннаан иһэн Таатта эбэ уутун-хаарын тутар быһыкка ыытыллар үлэни көрдүлэр, таарыйа саханы өллөйдөөбүт куйуурга сылдьан олус үөрэн-дуоһуйан кэллилэр.

Редакция үлэһиттэрэ нэһилиэк элбэх оҕолоох ыалларыгар көмө быһыытынан босхо сурутууну хаһыакка уонна сурунаалга оҥордулар. Маны тэҥэ музейдартан хаһыакка, сурунаалга сөптөөх, этэргэ дылы, сылы быһа суруллуон сөптөөх матырыйааллары хомуйдулар. Онон икки өттүттэн туһалаах көрсүһүү ыытылынна. Оҕо суруйааччыта С.В.Тарасенкоҕа эргилиннэххэ, кини СӨ Правительствотын председателэ А.Тарасенко кэргэнэ. Светлана Валентиновна Грознайга төрөөбүт, улааппыт сирэ Ленинград куорат эбит. Аҕата, инженер-тутааччы идэлээх киһи. Дьокуускай куоракка үлэлээбит, куораппытын тутуспут киһи эбит. Онон оҕо эрдэхпиттэн Саха сирин истэн улааппытым диэн сэмэйдик бэлиэтиир. «Үтүө үгэстэрдээх Саха сиригэр хаһан эрэ кэлиэхтээх этим, ону дьылҕам кэргэммин кытары сиэтэн аҕалла», – диэтэ.
Салгыы ыалдьыттарбыт Баайаҕаҕа, саха тыллаах духуобунай лиидэригэр Б.Ф.Неустроев-Мандар Уус аатын ааттаан айаннаатылар.

С.ХАЛГАЕВА