Судаарыстыбаннас национальнай өй-санаа сиппитин-хоппутун туоһулуур. 1922 сыллаахха Саха автономиятын үөскээһинэ, ол кэнниттэн 1991 с. Саха Өрөспүүбүлүкэтин статуһа үрдээһинэ биһиги национальнай историябыт XX үйэтээҕи сүрүн сабыытыйыларын быһыытынан саха норуотун, Саха сирин бары норуоттарын национальнай өйдөрө-санаалара бөҕөргөөһүнүн ити историческай түгэннэринэн бигэргэппиттэрэ.
Бу бэлиэ күҥҥэ үгэс курдук саха уһулуччулаах судаарыстыбаннай уонна бэлитиичэскэй диэйэтэл И.Н.Барахов мэҥэ тааһыгар тыыннаах сибэкки дьөрбөтүн уурар сүгүрүйүү буолла. Сүгүрүйүү Российскай Федерация уонна Саха Өрөспүүбүлүкэтин гимнинэн саҕаланна.
“Үөһээ Бүлүү улууһа” МО баһылыга В.С.Поскачин улуус обществонноһын, Харбалаах нэһилиэгин олохтоохторун бу үтүөкэн бырааһынньыгынан эҕэрдэлээтэ. Саха сирэ Суверенитеты ылыныытыгар бастакы Президент М.Е.Николаев үтүөтүн-өҥөтүн ахтан аһарда. Саха Өрөспүүбүлүкэтэ Российскай Федерацияны кытта тэҥҥэ үүнэр-сайдар, ол биһиги улууспут олоҕор, сайдыытыгар көстөр диэтэ.
“Харбалаах нэһилилиэгэ” МТ баһылыга К.Д.Платонов Суверенитет Декларациятын ылыныы бырааһынньыгынан эҕэрдэлээтэ. Өрөспүүбүлүкэбитин төрүттээбит Улуу дьоммутун ытыктабылынан аҕынна.
Оттон музей үлэһиттэрэ судаарыстыбаннас устуоруйатыгар аналлаах кылаас чаастарын, өй оонньууларын, тематическай экскурсиялар ыыттылар. “Я будущий Ил Дархан” диэн фотозона бу нэдиэлэ устатыгар музейга туруоҕа.
Судаарыстыбаннас күнэ Саха Өрөспүүбүлүкэтин бастакы Президенэ М.Е.Николаев аатын кытта ыкса сибээстээх. Онон кини судаарыстыбаннай үлэтин сырдатар кэлэр ыччакка кэпсиир быыстапка турда.

И.Н.Барахов аатынан СӨ судаарыстыбаннаһын музейын үлэһиттэрэ.