Бэҕэһээ Саха Өрөспүүбүлүкэтин чулуу уола, биллиилээх судаарыстыбаннай уонна уопсастыбаннай-политическай деятель Исидор Барахов төрөөбүтэ 120 сылыгар аналлаах үөрүүлээх миитин Үөһээ Бүлүү Харбалааҕар буолла. Бу тэрээһиҥҥэ улуус олохтоохторо эрэ буолбакка, Нам, Таатта, Бүлүү уонна Ньурба улуустарыттан делегациялар анаан-минээн кыттыбыттара элбэҕи туоһулуур.

Үөрүүлээх миитин иннинэ Бараахап аатынан саха судаарыстыбаннай мусуойун көрүү-истии буолла. Харбалаах орто оскуолатын үөрэнээччилэрэ Коля Николаев, Коля Чыбыков, Тимур Семенов Исидор Барахов оҕо эрдэҕинээҕититтэн саҕалаан оскуолаҕа, семинарияҕа хайдах үөрэммитигэр тиийэ олус ылыннарыылаахтык кэпсээбиттэрин кэлбит дьон олус сэргээн иһиттилэр. Нам улууһун Хатырык нэһилиэгэр баар М.Аммосов аатынан судаарыстыбаннас мусуойун научнай үлэһитэ Станислав Дьяконов бэйэтин мусуойун уонна Аммосов туһунан кэпсээбитэ эмиэ ураты буолла.

Исидор Барахов олорон ааспыт олоҕун, үлэтин билсии кэнниттэн уопсастыбаннас миитинэ буолла. СӨ бырабыыталыстыбатын бэрэссэдээтэлин солбуйаччы, И.Барахов төрөөбүтэ 120 сылыгар аналлаах үбүлүөйдээх тэрээһиннэри ыытар өрөспүүбүлүкэтээҕи хамыыһыйа бэрэссэдээтэлэ Михаил Гуляев: “Убаастабыллаах Үөһээ Бүлүү улууһун олохтоохторо, ыраахтан кэлбит ыалдьыттар! Барыгытын Саха сирин уһулуччулаах судаарыстыбаннай деятелэ, Саха сирин инникитин төрүттэспит Исидор Барахов төрөөбүтэ 120 сылынан Ил Дархан Егор Борисов, өрөспүүбүлүкэ бырабыыталыстыбатын ааттарыттан итиитик-истиҥник эҕэрдэлиибит! Саха дьоно маннык уһулуччулаах Исидор Барахов, Максим Аммосов, Платон Ойуунускай курдук дьон ааттарынан киэн туттуон туттар. Кинилэр баар буоланнар, саха Өрөспүүбүлүкэтэ баай, ураты историялаах, сайдыылаах. Кинилэр Сахабыт сирин төрүттэспит, эйэлээх олоҕу аҕалыыга туруорсубут өҥөлөрө хаһан да умнуллуо суоҕа ”,-диэн эттэ.

Салгыы Үөһээ Бүлүү улууһун баһылыга Владимир Поскачин: «Убаастабыллаах Үөһээ Бүлүү улууһун олохтоохторо, Тааттаттан, Намтан, Ньурбаттан, Бүлүүттэн кэлбит ытык-мааны ыалдьыттар! Барыгытын саха норуотун чулуу уола, уопсастыбаннай, судаарыстыбаннай деятель Исидор Барахов төрөөбүтэ 120 сылыгар аналлаах тэрээһининэн ис сүрэхпиттэн эҕэрдэлиибин! Ол ураты кэмҥэ 20-лээх эрэ уолаттар өрөспүүбүлүкэни төрүттээһиннэрэ оччотооҕу былаас кэмигэр улуу дьыла этэ. Кинилэр төрүттээбит өрөспүүбүлүкэлэрэ баччааҥҥа диэри этэҥҥэ үлэлээн-хамсаан кэлбитинэн бары киэн туттуох тустаахпыт. Биһиги өрөспүүбүлүкэбитин Бараахаптан, Ойуунускайтан саҕалаан дьоһун дьон салайан кэллилэр. Кэнники үс бэрэсидьиэммит эмиэ кинилэр суолларын тутуһан сөптөөхтүк салайбыттарын түмүгэр өрөспүүбүлүкэбит лаппа сайынна, инники өттүгэр тэтимнээхтик хардыылыыр. Саха сирин сайдар акылаатын түһэрбит дьонунан Бараахап, Ойуунскай, Аммосов буолаллар.

Салгыы инники өттүгэр тэтимнээхтик сайдарбыт туһугар биир санаанан салайтаран, быйыл кулун тутар 18 күнүгэр быыбарга бары күргүөмүнэн тахсаргытыгар ыҥырабын. Саха сирэ инникилээх, өссө сайдыаҕа. Исидор Барахов, Платон Ойуунускай, Максим Аммосов баҕа санаалара, эппит этиилэрэ туоллун! Түгэнинэн туһанан, өссө төгүл эҕэрдэлиибин! Туох баар үтүөнү, кэрэни, дьолу-соргуну баҕарабын! –диэн ылыннарыылаахтык, өрө күүрүүлээхтик эппитин мустан турар дьон «ураа» хаһыынан уруйдаатылар, айхаллаатылар.

Харбалаах нэһилиэгин баһылыга Илья Кузьмин уонна ыҥырыылаах ыалдьыттар ааттарыттан Таатта улууһун Чөркөөх орто оскуолатын дириэктэрэ Роман Обоюкин эҕэрдэ тылы эттилэр.

Эҕэрдэлэр кэннилэриттэн тэрээһиҥҥэ кэлбит уопсастыбаннас Исидор Бараховка сүгүрүйэрин биллэрэн, кини мэҥэ тааһыгар тыыннаах сибэкки дьөрбөлөрүн уурдулар.

Салгыы Харбалаахтааҕы мусуой аактабай саалатыгар Нам, Таатта, Бүлүү, Ньурба уонна Үөһээ Бүлүү улууһун ыччаттара «Саха сирин Аптаныамыйатын төрүттээччилэр сыдьааннарабыт» диэн тиэмэлээх төгрүк остуол тула мунньустан, Саха сирэ инникитин түстээбит судаарыстыбаннай деятеллэрин ааттарын салгыы үйэтитиигэ хайдах былааннаахтык үлэлиир туһунан кэпсэттилэр, санаа атастастылар.

Салгыы бу күн 3 чааска оройуоннааҕы култуура дьиэтигэр Исидор Барахов төрөөбүтэ 120 сылыгар аналлаах уопсастыбаннас үөрүүлээх мунньаҕа буолла.

«Үөһээ Бүлүү» хаһыат, 2018 сыл, олунньу 13 күнэ