ГБУ РС(Я) «Якутский государственный объединенный музей
истории и культуры народов Севера
им. Ем. Ярославского»
Платон Алексеевич Ойуунскай атаһа, доҕоро Исидор Никифорович Барахов төрөөбүтэ 120 сылынан Үөһээ Бүлүүгэ ыалдьыттааһын
23 марта 2018, 06:11

Саха омук барыта дириҥник ытыктыыр уонна сүгүрүйэр киһитэ, Саха государственноһын төрүттээччилэртэн биирдэстэрэ, Саха автономнай Республиката 1922 сыллаахха тэриллиитин тус бэйэтинэн саҕаласпыт уонна салгыы Саха саҥа тэриллибит республикатын политическай уонна экономическай өттүнэн бигэ тирэхтээх буоларыгар киһи ааҕан сиппэт элбэх кылаатын – өйүн-санаатын, күүһүн-күдэҕин харыстаабакка биэрбит, Платон Алексеевич Ойуунускай уонна Максим Кирович Аммосов атастара-доҕордоро Исидор Никифорович Барахов бу сылга төрөөбүтэ 120 сылын туолла.

Исидор Никифорович Барахов эмиэ биир сүрүн ураты дьоҕурдаах, чаҕылхай талааннаах дьонноох-сэргэлээх Үөһээ Бүлүү Харбалааҕар олунньу 12 (былыргылыы тохсунньу 31 күнэ) күнүгэр күн сирин көрбүтэ. Ол курдук Исидор Никофорович Барахов атастарын-доҕотторун төрөөбүт ытык  дойдуларыттан делегациялар: Ем. Ярославскай аатынан Хотугу норуоттар историяларын уонна культураларын холбоһуктаах Саха государственнай музейын директорын солбуйааччыта Ховров Александр Михайлович, Нам Хатырыгыттан Государственность историятын музей сэбиэдиссэйэ Александр Васильевич Кириллин, научнай сотрудник Станислав Александрович Дьяконов уонна Хатырык спортивнай залын директора, эдэр ыччат лидерэ Игорь Анатольевич Слепцов, Тааттаттан   Октябрьскай нэһилиэк баһылыгын солбуйааччы Дария Николаевна Огоюкина, П. А. Ойуунускай аатынан Чөркөөх орто оскуолатын директора Роман Владиславович Обоюкин,  Чөркөөхтөөҕү Государственность историятын музейыттан салайааччы Николай Ефимович Попов, научнай сотрудник Егор Витальевич Решетников,  Таатта ыччатын лидерэ Егоров Константин уонна Даайа Амма ыччатын лидерэ Поскачина Татьяна Үөһээ Бүлүүгэ, Исидор Никифорович төрөөбүт дойдутугар Харбалаахха 120 сыллаах  үөрүүлээх үбүлүөйүгэр, мунньахтарыгар ыҥырыылаах күндү ыалдьыттар буолан баран кыттан кэллибит.

Үөрүүлээх күнү аһыыИсидор Никифорович Барахов аатынан музейга өрө күүрүүлээхтик олохтоох кырачаан оҕо уһуйааннарыттан ытыктанар кырдьаҕастарга диэри бары кыттыыны ыллылар. Онтон үөрүүлээх чаһын кэнниттэн Исидор барахов памятнигар сүгүрүйүү уонна сибэкки ууруута буолла.

Ол кэнниттэн музейга киирэн төгүрүк остуол тула биэс улуус ыччата (Таатта, Нам, Бүлүү, Үөһээ Бүлүү, Ньурба), ыҥырыылаах ыалдьыттар правительство председателин солбуйааччыта Гуляев Михаил Дмитриевич, философскай наука доктора Михайлов Виктор Данилович, Чөркөөх уонна Хатырык музейдара кыттыылаах сүбэ-мунньах буолла. Мунньах түмүгүнэн, бу төгүрүк остуол тула мустубут биэс улуус ыччаттарын көҕүлээһиннэринэн, Былатыан ыччаттара (Таатта) уонна Максим ыччаттара түмсүүлэр холобурдарынан, 2022 сылга диэри Сахабыт сиригэр араас тэрээһиннэри олохтуохха уонна бары улуустар үйэтитиигэ күүскэ үлэлиэххэ диэн биир түмүккэ кэллилэр.

Онтон киэһэ Үөһээ Бүлүүгэ киирэн саҥа оройуон культуратын дьиэтигэр выставкаларбытын туруортаан, дьоҥҥо-сэргэҕэ билиһиннэрэн, кэпсээн баран залга киирэн саха театрын артыыстарын туруорууларын уонна Үөһээ Бүлүү талааннаах дьонун-сэргэтин, ыччатын ырыатын-тойугун, үҥкүүтүн дуоһуйа көрдүбүт, иһиттибит. Үөһээ Бүлүүлэр бу тэрээһини олус үчүгэйдик ылсан тэрийбиттэр. Үөһээ Бүлүү салалтатыгар, Үөһээ Бүлүү улууһун баһылыгар Поскачин Владимир Семеновичка, Исидор Барахов аатынан Государственность историятын музейын салайааччытыгар, үлэһиттэригэр Светлана Даниловна Копыленкоҕа, коллегаларбытыгар ытыс үрдүгэр илдьэ сылдьан ыалдьыттаппыккытыгар барҕа махталбытын тиэрдэбит.

Чөркөөх музейын үлэһитэ

Решетников Е.В.

Кулун тутар 14 күнэ 2018 сыл