Бүгүн ахсынньы 15 күнэ – саха литературатын төрүттээччилэртэн биирдэстэрэ Николай Денисович Неустроев төрөөбүтэ 125 сыла. Быйыл Саха сирин общественноһа бастакы реалист суруйааччылартан биирдэстэрэ, комедиограф Николай Денисович Неустроев үбүлүөйдээх сылын, төһө да дьаҥ-дьаһах турдар киэҥник бэлиэтиир. Төрөөбүт литературабыт күөх хонуутугар Николай Денисович бастакы комедиограф быһыытынан биллэр. Быйыл сайын төрөөбүт түөлбэтигэр мэҥэ өйдөбүнньүк туруоруллубута, бу күннэргэ Чөркөөхтөөҕү политссылка музейа “Төрөөбүт сирбэр, тапталлаах дьоммор” диэн суруйааччыга аналлаах баай ис хоһоонноох быыстапканы тэрийдилэр. Бүгүн суруйааччы төрөөбүт күнүгэр СӨ культураҕа уонна духуобунай сайдыыга министерствота, Таатта улууһун дьаһалтата Н.Д.Неустроев үбүлүөйдээх сылыгар аналлаах өрөспүүбүлүкэтээҕи онлайн үөрүүлээх тэрээһини ыытар. Биир үөрүүлээх түгэнинэн эдэр дьон туора турбакка суруйааччыга анаан ырыа суруйбуттара буолар.

Чөркөөхтөөҕү культура дьиэтин үлэһиттэрэ Афанасий Собакин тылларыгар, Михаил Прохоров аранжировкатыгар олус сэргэх “Куһаҕан тыын” диэн саҥа ырыатын бу сыл ахсынньы 20 күнүгэр киэһэ 20.00 чаастан «Виктория Саха» радиостанциятыгар сүрэхтиэхтэрэ. Онон классик суруйааччыбыт айымньылаах үлэтин эдэр дьон саҥа харахтарынан көрөн, аныгы сүүрбэ биирис үйэ тылынан музыкаҕа тиһэн киллэрэн саҥа тыыннаатылар. Николай Денисович Неустроев сүүрбэ биирис үйэ ааҕааччыларыгар хардыылыыр.

Светлана Халгаева 

Источник: https://ulus.media/2020/12/15/nikolaj-neustroev-s-rbe-biiris-je-aa-aachchylarygar-hardyylyyr/