Өрөспүүбүлүкэҕэ ахсынньы бастакы күнүгэр «Кыһын саҕаланар Саха сириттэн» диэн тэрээһин ыытыллар. Бу бырааһынньык чэрчитинэн Үөһээ Бүлүү Харбалааҕар өр сылларга оскуолаҕа учууталлаабыт, улууспут хаһыатыгар үлэлээбит, кэлин сылларга лесниктээбит айар тыл абылаҥар ылларбыт Руслан Михайлович уонна кини уола Александр Кривошапкиннарга аналлаах «Хаар бырааһынньыга» диэн хоһоон түһүлгэтэ ыытылынна.

«Кривошапкиннар маҥан аттара» диэн кинилэргэ аналлаах быыстапка турда. Манна Руслан Михайлович Бүлүүтээҕи педагогическай училищеҕа студенныы сылдьыаҕыттан суруммут күннүгэ, суруйбут ыстатыйаларын барытын мунньубут альбомнара, дьиэ кэргэнинэн түспүт хаартыскалара көрдөрүүгэ турдулар. Уола Александр Русланович аҕатын курдук эмиэ суруйар дьоҕурдааҕа оҕо эрдэҕиттэн биллибит. 8-с кылааска сылдьан «Хаар» ырыаны суруйбута биллэр. Кини күннээҕи туох түбүктээҕин, эмискэ иэйии киирэн суруйталаабыт тэтэрээттэрэ, кыра балтытыгар Ираҕа Казахстантан суруйбут суруга быыстапкаҕа туран дьон болҕомтотун тарта.

Бүлүү куоратыттан уонна Ороһуттан Руслан Михайлович бииргэ төрөөбүт балтылара, Дьокуускай куораттан сиэннэрэ күндү ыалдьыт буоллулар.

2006 сыллаахха «Дьылҕам маҥан ата» диэн кинигэ тахсыаҕыттан Руслан Михайлович хоһоонноругар ырыалар айыллалларыттан биир дойдулаахтара олус үөрэбит. Хоһоон тутулун барытын тутуһарын туһунан филологическай наука доктора Тобуроков Н.Н. «Дьиҥнээх поэт олорон ааспыт» диэн ыстатыйатыттан билиэххэ сөп. Биир ураты хоһооно народнай суруйааччы П.Тобуруокап курдук харыйа формалаах хоһоонноох.

Руслан Михайлович уола Александр Кривошапкин  Казахстаҥҥа олорон, саха оҕолорун көрсөөрү, Красноярскайга кэлэн барар эбит. Ол саҕана Красноярскайга үөрэнэр оҕолор кинини «Хаар Сааска» диэн ааттыыллара үһү. Устудьуон оҕолорго уопсайга бэйэтин хоһоонугар суруйбут ырыатын «Хаары» толороро.  Бу ырыаҕа Александр Адамов, Үөһээ Бүлүүттэн кэлэн, клип устан биэрдэ. «Хаар» ырыаны толордо быраата 10-с кылаас үөрэнээччитэ Мичил Кривошапкин.

Бу бырааһынньыкка Руслан Михайлович сиэннэрэ хоһоон аахтылар, эһэлэрин айымньытын киэҥ эйгэҕэ таһаардылар. Оскуола оҕолоро, учууталлара, култуура үлэһиттэрэ Кривошапкиннар хоһооннорунан кыһын туһунан композиция туруоран киэһэни киэргэттилэр.

Кинилэр айар талааннарын үйэтитиигэ үлэлиэхпит диэн нэһилиэк баһылыга Платонов К.Д. эҕэрдэ тылыгар тоһоҕолоон бэлиэтээтэ. Бу «Хаар бырааһынньыга» диэн хоһоон киэһэтэ мэлдьитин бу күн ыытыллыа диэн былааннаахпыт.

Семенова Евдокия Павловна,

И.Н.Барахов аатынан СӨ судаарыстыбаннаһын музейа