Соторутааҕыта П.А.Ойуунускай аатынан Судаарыстыбаннас музейыгар «Вдохновение художника» диэн ааттаах быыстапка аһыллыбыта. Манна Таатта улууһугар олорор уруһуй кэрэ эйгэтигэр үлэлиир учууталлар, биирдиилээн дьон үлэлэрэ туруорулунна.

Быыстапка аһыллыытыгар «Улуустааҕы норуот айымньытын дьиэтин» директорын солбуйааччы, РФ худуоһунньуктарын сойууһун чилиэнэ, «Оһуордаах Таатта» бренд төрүттээччитэ Марианна Степанова кыттыыны ылан, биир идэлээхтэрин худуоһунньук күнүнэн эҕэрдэлээтэ.

Ол курдук, музей истиэнэтигэр томороон тымныыны мэлдьэһэн сайыҥҥы кэрэ сибэккилэр суугунуу тылланнар, Хадаайы хатыҥнара хамсааннар, ол быыһыгар саханы саха дэтэр төрүт дьарыкпыт – муҥха кэмэ уо.д.а. уруһуйдар болотуналартан кэпсии-ипсии тураллара көрүөххэ олус үчүгэй, тардыылаах.

Салгыы «Төгүрүк остуол» тула олорон санаа үллэстиитэ, аһаҕас кэпсэтии ыытылынна. Ол түмүгүнэн маннык быһаарыы ылылыннылар: бастакытынан, Судаарыстыбаннас музейыгар «Худуоһунньук хоһун» аһарга; иккиһинэн «Таатта – ойууһут биһигэ» бырайыак былаанынан худуоһунньуктуун көрсүһүүнү тэрийии; үсүһүнэн, «Таатта – ойууһут биһигэ» бырайыак чэрчитинэн, кэлэр сыл олунньу ыйыгар «И.В.Попов айар үлэтин сырдатар» уруһуй күрэхтэһиитигэр бэлэмнэнии; төрдүһүнэн, өрөспүүбүлүкэтээҕи «Уус, иис, ас фест» тэрээһинигэр анал балаһаакка тэриллэринэн, айар үлэни көҕүлүүр, сайыннарар хайысхаларын толкуйдааһын, оҕолорго уонна улахан дьоҥҥо аналлаах маастар-кылаастары, «Худуоһунньук лааппытын» нөҥүө атыыланар оҥоһуктары элбэтиигэ болҕомтону ууруу; бэсиһинэн, айан бырайыак чэрчитинэн суруйар дьоҕурдаах оҕолору, учууталлары кытта легендариумнары суруйан сүрүн геройдарын уруһуйдааһын, тэттик кинигэлэри оҥоруу, сувенирдары, туттар маллары оҥоруу уо.д.а.

Быыстапка кэмигэр Людмила Захарова Былатыан балаҕаныгар төгүрүччү олордон буруо таһаарар балаҕаннары, чааскылары туойтан оҥорторон маастар-кылаас тэрийдэ.
Онон уус дьон мустубут быыстапката бары өттүнэн туһалаахтык, ыллыктаах инники кэпсэтиилээх ааста. Былатыан Ойуунускай музейын истиэнэтигэр айар эйгэлээх дьон кэпсэтиилэрэ, былааннара кэскиллээх, инникилээх буоларыгар баҕарабыт.

С. ХАЛГАЕВА

Хаартыскаларга: быыстапка түгэннэриттэн.