Муус устар 15 күнүгэр Саха сиригэр Комсомол тэриллибитэ 100 сылыгар аналлаах Үөһээ Бүлүүтээҕи этнография музейа уонна Харбалаахтааҕы И.Н. Барахов аатынан государственность музейа туруорбут «Комсомол үүннэрбит дьоһун дьоно» выставка арыллыыта буолла. Эҕэрдэ тылы Георгий Алексеевич Степанов – Үөһээ Бүлүү совхоз комсомолун босхоломмут сэкэритээрэ, Томпо райкомун бастакы сэкэритээрэ, Үөһээ Бүлүүтээҕи компартия бэрэссэдээтэлэ, Александр Васильевич Долгунов – Үөһээ Бүлүүтээҕи райком бастакы сэкиритээрэ эттилэр, ол кэмнээҕи комсомол үлэһит дьонун ахтан, санаан аастылар.

Выставканы көрө дьон тоҕуоруһан кэлбиттэриттэн киһи үөрэр, дьиэҕэ хаайтаран олорбут аҕам саастаах күндү дьоммут көрсөн ирэ – хоро кэпсэтэн, хаартыскаҕа түстүлэр,үйэтитиигэ киирдилэр.
Выставкаҕа биһиги музей чуолаан Харбалаах ыччата 1980 сылга бары сиэттиспитинэн оскуоланы бүтэрээт И.Н. Барахов аатынан совхоз отделениятыгар фермаҕа үлэлии тахсыбыттарын көрдөрдүбүт. Эдэркээн Калиста Иванова салайааччылаах “Олимпиада – 80” диэн ыччат комсомольскай биригээдэтин тэринэн 10 – ча ыччат таһаарыылаахтык үлэлээбиттэрэ. Кинилэр үүт ыамыгар хайа да нэһилиэккэ бастакынан сылдьыбыттара, бэл диэтэр Оҥхой, Күүлэт ыччаттара кинилэргэ тэҥнэһээри күүскэ үлэлээбиттэрэ.

Бу охсуулаах фроҥҥа Харбалаах үлэһит дьонун киллэрбит кылааттара, онно ыччаттар комсомольскай көхтөрө ыараханы кыайар дьулуурдара, ол кэмҥэ быһаарар оруоллаах этэ…
Музейга выставка арыллыытын кэннэ, ыалдьыттар улуустааҕы кииннэммит библиотекаҕа бары тутуспутунан тахсан төгүрүк остуолга кытыннылар.