Быйыл Кыайыы 77 сылын биир дойдулаахпыт, 98 саастаах сэрии кыттыылааҕа, үлэ, спорт, туризм ветерана Слепцов Наум Трифонович бар дьонун ортотугар чөл туруктаах хаһааҥҥытааҕар да сүргэтэ көтөҕүллэн туран үөрэ-көтө көрсөрүттэн  тэҥҥэ үөрэбит  уонна итии-истиҥ эҕэрдэбитин тиэрдэбит.

Науму оҕо сырыттаҕына П.А.Ойуунускай төбөтүттэн имэрийбитин билэр киһи ахсааннаах буолуо, төрөөбүт Чөркөөҕөр кэлэ сылдьан биһиэхэ учууталбыт  ону  бэлиэтээн кэпсээн турар.

Ийэм Настааччыйа хоноһолорго элбэх интириэһинэй чахчылары кэпсиирин киирэ-тахса истэрим. С.А.Новгородов,  А.Е.Кулаковскай-Өксөкүлээх Өлөксөй, Уот Субуруускай, Куоста Сокольников, П.А.Ойуунускай тустарынан.

• Ийэм Ойуунускайы кытары биир сайын бииргэ оттообуттар. Онно уоллара омурҕаҥҥа чэй өрө сылдьан ырыа-тойук бөҕөнү түһэрэрэ үһү.
• Арааската 1935-1936 сылларга буолуо. Ойуунускай уонна Эллэй олоҥхо хомуйа сылдьаллар диэн иһилиннэ. Күһүөрү этэ, биһиги хас да уол буолан барбыппыт. Оскуола аана иһиттэн хатаммыт этэ, ону түннүгүнэн көрө сатаабыппыт.
• 1937 сыл күһүнэ, Ойуунускай оскуолаҕа быыбардааччыларын көрсүһэр үһү диэн буолла. Биһиги Ньукулай Андросовтыын сыбдыйан  киирэн, көрүдүөртэн  мунньах бүтүөр диэри туран көрбүппүт. Син балай да өр буолла, ол устатын тухары Ойуунускай биирдэ мичээрдээбитин, күлбүтүн көрбөтөхпүт. Хайдах эрэ санааҕа ылларбыт курдуга. Мунньах бүтэн таһырдьа тахсан иһэн миигин төбөбүттэн имэрийэн ааспыта уонна оҕолор үөрэҕи кытаатыҥ, үөрэхтээх дьон буола улаатыҥ диэтэ.
• 1957 с. пионерскай лааҕыр. Урукку бырааба дьиэ (умайбыт оскуолабыт турбут сирэ). Лааҕыр оҕолоруттан 8 оҕону илдьэ Ойуунускай балаҕаныгар хонордуу поход оҥордубут. Соҕуруу диэки турар балаҕаҥҥа хоннубут, Ойуунускай тэлгэһэтин көрдүбүт. Ойуунускай туһунан тугу билэрбин кэпсиибин.

1957 с. ”Ынах алааһа” фермаҕа Петрова Евдокия диэн биллиилээх доярканы кытары лааҕыр оҕолорун көрсүһүүлэрэ

1957 с. Чөркөөх Пионерскай лааҕыр оҕолоро, заведующай Кулаковская Л.Р., воспитатель Слепцов Н.Т.

• 1967 с. Горнай Кэптинин 8 оҕотун илдьэ уһун походка туруннубут. Амма Солободатыгар  самолетунан кэллибит. Туризмҥа улахан күрэх буола турара. Амматтан Чөркөөххө диэри 5 күн сатыы айаннаабыппыт. Чөркөөххө бэйэм дьиэбэр түһэрэн (Оҕочуяровтаахха) хас да хонон Чурапчынан, Төҥүлүнэн куоракка 22 –ис күммүтүгэр тиийбиппит. Барыбытыгар “Турист СССР” диэн значок уонна удостоверение биэрбиттэрэ. Чөркөөххө сылдьан оҕолорбун биир күн анаан-минээн Ойуунускай балаҕаныгар сырытыннараары  Таатта үрэҕин харбаан туораабыппыт.
• Чөркөөх оскуолатыгар үлэлиир сылбар 1963с. (төрөөбүтэ 70 сыла) Ойуунускай балаҕанын сөргүппүппүт иһин, таһын ыраастаан портрет уонна стенда оҥорон ыйыталаабыппыт. Оччотооҕуга Ойуунускай туһунан кэпсэтии суоҕа. Онон эмиэ биир үтүө суолу оҥорбут эбиппин диэн дэнэ саныыбын.

П.А.Ойуунускай улуу киһи буоларын үйэм тухары итэҕэйэн, ону эдэр ыччат, оскуола оҕолоро өйдөөтүннэр, биллиннэр диэн син балай даа үлэлээбит эбиппин диэн киэн туттуна саныыбын.

Хос быһаарыы: 1957с. хаартыскалар учуутал Н.Т. Слепцов бэлэҕэ – Чөркөөххө П.А. Ойуунускай судаарыстыбыннас музейын фондатыттан.

                                            П.А.Ойуунускай судаарыстыбаннаһын музейын фондатын
үлэһитэ Дария Кириллина,
Чөркөөх музейын специалиһа Изабелла Жерготова. Ыам ыйын 8 күнэ, 2022 сыл