Бүгүн кулун тутар 2 күнүгэр уутуйан үөскээбит олоҥхоһуттардаах, ылбаҕай ырыаһыттардаах, саха норуотугар элбэх талааннаах суруйааччылары бэлэхтээбит Таатта Эбэ Хотуҥҥа Олоҥхо күнэ үүннэ. Таатта улууһун культуратын уонна духуобунай сайдыытын салаатын уус-уран айымньытын киинэ (сал. Вырдылин Г.Г., Егорова М.Г.) эрдэттэн бэлэмнээн улуус киинигэр, бары нэһилиэктэригэр киэҥ далааһыннаах тэрээһиннэр ыытылыннылар.
Саас иһэр кэмигэр бүгүн кырдьаҕас Чөркөөх нэһилиэгэр уулуссаҕа сарсыардаттан олоҥхо иһиллэр, тэрилтэлэринэн олоҥхоҕо аналлаах араас тэрээһиннэр буоллулар.

Санаттахха, 1999 сыллаахха Олоҥхону өрө туппут Былатыан Ойуунускай дойдутугар кини суолун солоон учуутал идэлээх сэбиэскэй-партийнай үлэһит П. Е. Решетников аан бастаан “Аһыныгас санаалаах Айыы Дьураҕастай бухатыыр” диэн бастакы олоҥхотуттан быhа тардан Чөркөөхтөөҕү политсыылка музейын дьиэтигэр олоҥхолоон турар. Олоҥхо дьоро киэһэтин оччолорго Чөркөөх музейын сэбиэдиссэйэ И.Я.Жерготова, Чөркөөх орто оскуолатын саха тылын уонна литературатын учуутала А.И.Аржакова тэрийэн ыыппыттара, олохтоох нэһилиэк салалтата, музей уонна театр коллективтара кыттыыны ылбыттара.

Олоҥхону киэҥник пропагандалаабыт биир дойдулаахпыт, Чөркөөх музейын салайааччыта, саха норуодунай суруйааччыта Д.К.Сивцев – Суорун Омоллоон музейы тутууга бииргэ үлэлээбит үөлээннээҕэ П.Е.Решетников олоҥхолоон эрэрин улаханнык сэҥээрбитин биллэрбитэ, киниэхэ махтанан алгыһын анаабыта.

П.Е.Решетников «Аhыныгас санаалаах Айыы Дьура5астай Бухатыыр» олоӊхотун 1999 с. Чөркөөххө музей дьиэтигэр толорбутун истэргитигэр ыҥырабыт https://youtu.be/4aLAzBsBCPk  

Музей салалтата матырыйаалы таҥан оҥорбут Н.Н.Туласынов аатынан ДНТ үлэһитигэр М. Прохоровка махталын биллэрэр.

Изабелла Жерготова. Чөркөөх