Бу күн самаан сайын салаллан кэлэн, сайаҕас салгынынан сайа охсон , үтүө да кэм эргийэн, үүнэр күөх өрө үтэн, сылгы, ынах төрөөн-ууһаан, үүт-ас өрө үллэн, уйгу-быйаҥ кэлэн, былык ыан, байым олох эргийэн саха дьоно мунньустан, сайылыкка тахсара «Саҥа кэм буолла , саҥа күөх буолла, саҥа дьыл кэллэ» – дэһэллэрэ, эҕэрдэлэһэ көрсөллөрө.

Сайылыкка көһүү сахаларга улахан үөрүүлээх күн. Бу күн Дойду иччитигэр Аан Алахчын Хотуҥҥа анаан сиэр-туом оҥороллоро. Бар дьон олоҕо, сүөһү төрүөҕэ этэҥҥэ турарыгар көрдөһөн аар хатыҥ маска ситии быаттан өрүллүбүт салама ыйыыллара. Салама туому харыстыыр уонна айылҕаны кытта чугаһатар.

Ынах, торбос турар сирин титиик иһигэр анаан сыттаах оту уматан буруонан ыһаараллара, ол-бу куһаҕан тыынтан, ыарыыттан-сүтүүттэн сүөһүнү араҥаччылыыллара.

Тоҕус ыйдаах тымныыбытын этэҥҥэ туораан,
Аҕыс ыйдаах кыһыммытын кыйдаан,
Кэрэ кэммит эргийэн
Уруй тылы этиэҕиҥ!
Күөх сайын кэлбитин
Эҕэрдэлии көрсүөҕүҥ!

Николай Бугаев,
Саха музейын директора,
Ил Тумэн депутата