Ыам ыйын 25 – 26 күннэригэр Хаҥалас улууһун Хачыкаат нэһилиэгэр «Алексей Кулаковскай – Саха сирин духуобунай лидерэ» диэн научнай-практическай симпозиум ыытылынна. Бу тэрээһин Өксөкүлээх Өлөксөй төрөөбүтэ 145  уонна «Интеллигенцияҕа суруга» суруллубута 110 сыллаах бэлиэ сылларыгар ананна.

Урутаан эттэххэ, симпозиум үөрүүлээх  аһыллыытыгар Ил Дархан Айсен Николаев бу сыл ыам ыйын 25 күнүнээҕи 2461 №-дээх уурааҕынан  2023 – 2027 сс. норуот духуобунай лиидэрэ А.Е.Кулаковскай-Өксөкүлээх Өлөксөй сылларынан биллэрдэ. Биэс сыллаах, уруккулуу эттэххэ, пятилеткаҕа үүнэн иһэр эдэр көлүөнэҕэ сахалыы кут, төрөөбүт тылга саҥалыы сыһыан, саҥа тыын тыыллан-хабыллан тахсыаҕа диэн эрэнэбит.  Ол аата ордук үүнэн иһэр көлүөнэҕэ  духуобунай өттүнэн өй-санаа уһуктуутугар, тыллыытыгар далаһа буолуо турдаҕа.

Ыраах 1926 сыллаахха Былатыан Ойуунускай: «Өксөкүлээх өлбүтүн иһин – чинчийбит чинчиирэ хаалла, онтуката сылтан сылга дириҥээн иһиэҕэ. Суруйбут хоһооно, туойбут тойуктара, ыллаабыт ырыалара – саха норуотугар үйэттэн үйэҕэ бэриллэн, үөрэтиллэн иһиэхтэрэ. Өксөкүлээх үөскээбит, олорбут, үлэлээбит бэлиэтэ хаалла, айар тылынан сүппэт, өлбөт гына дьүһүннэннэ», – диэн бэлиэтээбит кэриэс-хомуруос тыла тиллэн кэллэ.

Симпозиум үлэтэ үрдүк таһымнаахтык ааста. Манна Өрөспүүбүлүкэ бастакы Президенэ М.Е.Николаев, СӨ норуотун дьыалатыгар уонна тас сибээстэһии министрэ Г.В.Кириллин, СӨ духуобунай сайдыыга уонна культураҕа министрэ Ю.С.Куприянов, СӨ Государственнай мунньаҕын сис комитетын председателэ Е.Х.Голоморева, «Таатта» улууһун баһылыга М.М.Соров, «Хаҥалас» улууһун баһылыга О.В.Иринеев уо.д.а. кыттыыны ыллылар.

Бу тэрээһиҥҥэ Чөркөөхтөөҕү политссылка музейын сэбиэдиссэйэ Н.Е.Попов, П.А.Ойуунускай аатынан Судаарыстыбаннас музейыттан специалистар М.Е.Барахова, С.С.Халгаева баран кыттыыны ыллылар. Симпозиум улахан түһүлгэтин секцияларыгар кыттан, санаа атастаһан, үлэҕэ сонун саҕалааһыннары истэн, саҥаны билэн-көрөн кэллилэр. Ол курдук, чуолаан  «Кулаковскай айанын суола» туристическай маршруту тэрийии Таатта улууһугар олус актуальнай. Бу секцияҕа Марианна Барахова  кытынна. Секцияны СӨ Туризмҥа уонна атыыга-эргиэҥҥэ, предпринимательствоҕа министрин бастакы солбуйааччы М.Г.Карбушев салайда. Марианна Егоровна, Чөркөөх музейдарын бырайыактарыгар сөп түбэһиннэрэн,  Өксөкүлээх Өлөксөй айанын суолун көрдөрөр  маршрутун сайыннарарга этии киллэрэн, көмүскээтэ. Үөрүүлээҕэ диэн, туризм министерствота бу бырайыагы салгыы үөрэтиигэ, болҕомтоҕо ылбыта буолла.

Улахан түһүлгэҕэ кыттыыны ылан, олохтоох музейдар тиһиктэрэ туризмы сайыннарыы, саҥардыы үлэтин торумнарыгар санааларын тиэртилэр.

С.ХАЛГАЕВА

Хаартыскаларга: Симпозиум ытык ыҥырыылаахтара СӨ бастакы Президенэ М.Е.Николаев, Өксөкүлээх Өлөксөй сиэнэ Р.Р.Кулаковская; Таатта делегацията.