“Үйэлээх мал” (“Өбүгэм ситимэ”)  куонкуруска сүүстэн тахса киһи кытынна

 “Саха сирэ” хаһыат уонна “Эдэр саас” сайт, Емельян Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейа Саха АССР 100 сылынан, 2022 сыл Саха Өрөспүүбүлүкэтигэр – Ийэ, РФ — Арассыыйа норуоттарын култууратын үйэлээх баайын сылларынан тэрийбит “Үйэлээх мал” (“Өбүгэм ситимэ”) диэн хаартысканан уонна видеонан куонкуруһа түмүктэннэ.

Куонкуруска Кэбээйиттэн, Тааттаттан, Чурапчыттан, Сунтаартан, Хаҥаластан, Бүлүүттэн, Өлүөхүмэттэн, Уус Алдантан, Жатайтан, Дьокуускайтан, Горнайтан, Үөһээ Бүлүүттэн, Хатастан, Мииринэйтэн, Намтан, Орто Халыматтан, Мархаттан, Амматтан, Мэҥэ Хаҥаластан барыта 109 киһи кытынна.

Спонсордар: Дьокуускай куорат дьаһалтата, СӨ Ыччат дьыалатыгар уонна социальнай коммуникцияларга министиэристибэтэ, СӨ Култуура уонна устуоруйа эбийиэктэрин харыстыыр департамент, “Чороон ХХI үйэ” ХЭУо, “Уус Экспо” маҕаһыын, “Айар” национальнай кинигэ кыһата, ИП “Р.Федотов.

Дьүүллүүр сүбэҕэ Емельян Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейын, “Сахамедиа” РИИХ “Саха сирэ” хаһыат үлэһиттэрэ кытыннылар. Анал ааттарынан кыайыылаахтар маннык быһаарылыннылар.

“Үйэлээх мал”

Татьяна Бубякина, Өлүөхүмэ, II Нөөрүктээйи. Мас орон, хомуот, уо.д.а. маллара болҕомтону тартылар. Сүүстэн тахса сыл буолбуттарын бэлиэтээн этэр.

Евдокия Кустурова, Таатта, Баайаҕа. Эбэтин Сокольникова (Бетюнова) Дария Тарасовна (1880-с сыллар диэки төрөөбүт) хаһыаччыга. Ону сэргэ, кыбытык тигиилээх хаппар, кыбытык тигиилээх этэрбэс билэтэ.

Евдокия Черкашина, Мэҥэ Хаҥалас, Павловскай. Кириэс. 1800 с. бүтэһигин диэки буолуон сөп диэн этэр, былыргы харчылар, уо.д.а.

“Мин дьиэ кэргэним кэриэс мала”

Александра Соловьева, Чурапчы Соловьев нэһилиэгэ. Иҥиир сабынан тигиллибит бытархай оҕуруолаах дьабака бэргэһэ киэргэлэ, о.д.а.

Христина Федулова, Чурапчы, Дириҥ. Куобах кулгааҕыттан суорҕан, солотуулаах үрүҥ көмүс биһилэх, үрүҥ көмүс кулгаах хастар, о.д.а.

Антонина Стручкова, Таатта, Чычымах. Кычым, чорооннор, кыһыл көмүс биһилэх, о.д.а.

 СӨ историятын кытта сибээстээх мал (История кэрэһитэ)

Галина Белых, Хаҥалас, Чкалов. Олохтоох нэһилиэк сэбиэтин бэчээтин уура сылдьар. Таайа Кононов Семен Константинович (1911-1987 сс.) 20 сааһыттан олохтоох сэбиэккэ үлэлэспит. 1936 сылтан бэрэссэдээтэли солбуйбут, 1938-1950 сс. бэрэссэдээтэллээн нэһилиэгин салайбыт.

Октябрина Ксенофонтова, Сунтаар, Тойбохой. 1906 с.т. эбэлэрэ, хос, хос-хос эбэлэрэ оҕо сылдьан уруһуйдаабыт уруһуйдара. 105 сыл анараа өттүгэр буолбуту кэпсииллэр.

Чэмэлиинэ Моржотова, Өлүөхүмэ, Абаҕа. 1930 сыллаахха ийэтин эдьиийэ Антонова Агафья Николаевна тикпит сарыы үтүлүгэ 90-тан тахса сыл буолбут. Иһэ – куобах түүтэ, Таһыгар кыһыл саһыл тыһынан аттарыллан тигиллибит киэргэтиилээх.

Сэдэх мал

Елена Санникова, Мэҥэ Хаҥалас, Хорообут. Аҕата Бродников Иннокентий Афанасьевич ииппит дьонун өтөҕөр, былыргы ампаарга, кымыс хамнатар баарын хаартыскаҕа түһэрэн ыыппыт. Сүүс сыл анараа өттүгэр оҥоһуллубут буолуон сөп диэн суруйар.

Полина Сосина, Мэҥэ Хаҥалас, Моорук. Ийэтиттэн хаалбыт суһуох киистэтин харыстаан уура сылдьарын суруйар. “Ийэм  1906 с.т.” диэн ыйар. Маннык киистэлэр В.Серошевскай  “Якуты”, Б.Ф.Неустроев-Мандар Уус “Саха ойуута-бичигэ” кинигэлэригэр 18-19 үйэлэргэ бааллара суруллар” диэн суруйар.

Валентина Пинигина, Таатта, Боробул. Алтан чаан (Олгуй). “Хос эһэбититтэн хаалбыт. Билигин да туһалыы турар”, — диэн суруйар. 18-с үйэ бүтүүтэ, 19-с үйэ саҥата буолуон сөп диэн этэр.

Edersaas.ru саайтка куоластааһынынан Зоя Багынанова кыайыылааҕынан таҕыста.