Бу күннэргэ музейбытыгар ыраах Шотландия Абердин куоратыгар олорор биир дойдулаахпыт Татьяна Аргунова-Лоу кыыһынаан Екатериналыын ыалдьыттаатылар. Кинилэри Дьокуускай куоракка олорор Татьяна балтыта Людмила Попова арыаллаан илдьэ сылдьар. Татьяна Аргунова-Лоу Абердин куорат университетыгар социальнай антропология кафедратын старшай преподавателэ, кыыһа быйыл режиссер үрдүк үөрэҕин бүтэрэн айар эйгэ идэтин салгыы баһылыырга суолун тэлэр. Биир дойдулаахпыт төһө даҕаны ыраах сиргэ олордор хас сайын аайы дойдутугар кэлэн барар. Чөркөөх музейдарын быһа ааспакка сылдьар. Бу сырыытыгар аҕатын партийнай-сэбиэскэй үлэһит, Аҕа дойду Улуу сэриитин кыттыылааҕа, Саха АССР үөрэҕин министрин солбуйааччынан, “Кыым” хаһыат редакторынан уо.д.а. эппиэттээх үлэлэргэ үлэлээбит Иван Александрович Аргунов тус малын, кумааҕыларын аҕалан музейбыт фондатыгар туттарда. Иван Александрович олохтон 1988 сыл алтынньы ый бүтүүтэ барбыт. Оччолорго “Социалистическая Якутия” хаһыакка обком сэкирэтээрэ Ю.Н. Прокопьев, Л.Н. Григорьева, С.Н. Маркин, Т.Г. Десяткин уо.д.а. Саха сирин салайан олорор бас-көс илии баттааһыннаах дьон кутурҕаннарын биллэрбиттэр. Иван Александрович Аргунов бу дьону кытары биир кэмҥэ үлэлээн, Саха сирэ сайдар олугун уурсарга бэйэтин кылаатын киллэрбит салайааччы буолар.

         Музей фондатыгар Иван Александрович Аргунов илиитинэн суруллубут бэлиэтээһиннэрэ, блокноттара, кини дьиэ кэргэнигэр Саха сирин суруйааччылара илии баттааһыннаах бэлэхтээбит кинигэлэрэ, хаартыскалар, үгүс партия ыҥырыылаах мунньахтарын илдьиттэрэ уо.д.а. маллара туттарылынна. Татьяна Аргунова-Лоу кыыһыгар туһаайан: «Кэлин эһэҥ туһунан матырыйаал көрдүүр буоллаххына чопчу манна кэлэҕин», — диэн бэлиэтээн эттэ. Ити курдук ыраах олорор биир дойдулаахпыт аҕатын үлэлэрин, өйдөбүнньүгүн Былатыан Ойуунускай музейыгар үйэ саас уурдара хаалларда.