Харбалаах нэһилиэгэр Исиидэр Бараахап аатынан судаарыстыбаннас түмэлин тэлгэһэтигэр бөдөҥ общественнай, политическай диэйэтэл Исиидэр Бараахап сырдык аатыгар сүгүрүйэн, өрөспүүбүлүкэбит уонна улууспут салалтата, Харбалаах нэһилиэгин дьоно-сэргэтэ чулуу киһибит мэҥэ тааһыгар сибэкки дьөрбөтүн уурдулар. Үөрүүлээх тэрээһиҥҥэ СӨ Ил Дарханын дьаһалтатын уонна правительствотын дьыалаларын салайааччыта Георгий Николаевич Михайлов, Ил Түмэн наукаҕа, үөрэххэ, култуураҕа, көрдөрөр-иһитиннэрэр эйгэҕэ уонна общественнай тэрилтэлэр дьыалаларыгар сис кэмитиэтин бэрэссэдээтэлэ Феодосия Васильевна Габышева, Үөһээ Бүлүү улууһун баһылыга Владимир Семенович Поскачин уонна Харбалаах нэһилиэгин баһылыга Константин Данилович Платонов Исидор Барахов саха норуотун саргытын салайсыбыт үтүөтүн, саха тылын уонна экономикатын сайдыытыгар киллэрсибит сүдү кылаатын махталлаахтык ахтан-санаан аастылар.

Салгыы мустубут дьон Харбалаах сынньалаҥ киинигэр Исиидэр Бараахап аатынан судаарыстыбаннас түмэлин үлэһиттэрэ бэлэмнээбит “Эти прекрасные люди” экспозициятын сэҥээрэ көрдүлэр. Ону тэҥэ Үөһээ Бүлүү улууһун социальнай-экономическай сайдыытыгар кылааттарын киллэрбит, үтүө суобастаахтык үлэлээбит дьоҥҥо судаарыстыбаннай наҕараадалары үөрүүлээх быһыыга-майгыга туттардылар. Саха АССР төрүттэммитэ 100 сылыгар Үөһээ Бүлүү улууһун икки нэһилиэгэр, Дүллүкү уонна Өргүөт нэһилиэктэрин баһылыктарыгар РФ государственнай геральдическай регистрыгар Дүллүкү уонна Өргүөт нэһилиэктэрин гербэлэрэ уонна былаахтара бигэргэнэн киирбиттэрин туһунан туоһу суруктары туттарбыттара эмиэ үөрүүлээх, улахан историческай суолталаах түгэн буолла. Улуу киһибит Исиидэр Бараахап саха норуота сайдарын туһугар үгүс сыратын, олоҕун толук ууран туран үлэлээбит үтүөтүн билиҥҥи сайдыылаах олоххо олорон, махталлаахтык саныыр, сырдык аатын үйэттэн үйэҕэ ааттыыр ытык иэстээхпит.