Бу күннэргэ Таатта улууһугар СӨ Ил Түмэн Судаарыстыбаннай мунньаҕын оробуочай бөлөҕө икки күн устата үлэлээн барда. Делегацияны Ил Түмэн мунньаҕын бэрэссэдээтэлэ Алексей Еремеев салайан илдьэ сырытта. Сүрүннээн депутаттар олохтоох бэйэни салайыныы органыгар саҥа сокуон киирэр барылын тула кэпсэттилэр.

Таатта өҥ буоругар үктэнээт даҕаны, депутаттар Ытык Күөлгэ турар Былатыан Ойуунускай мэҥэ өйдөбүнньүгэр тохтоон, тыыннаах сибэкки дьөрбөтүн ууран, миитиҥ тэрийэн икки күннээх үлэлэрин саҕалаабыттара. Салгыы улуус салалтатын кытта мунньахтаан, тыа сирин оҥорон таһаарааччыларын үлэлэрин көрөн, Баайаҕаҕа саха омук духуобунай лиидэринэн билинэр Б.Ф.Неустроев-Мандар ууска ыалдьыттаан, сүбэ-соргу тылларын истэн аастылар.

Улууска оробуочай бөлөх сырыытын түмүктээн,  А.И. Еремеев уонна улууспутуттан депутаппыт Я.А. Ефимов, маны таһынан кинилэри арыаллаан Октябрьскай нэһилиэк баһылыга А.П. Семенов Чөркөөххө Былатыан Ойуунускай аатынан судаарыстыбаннас музейыгар тохтоон, көрөн, үлэ-хамнас туһунан билистилэр. Алексей Ильич музейбытын иҥэн-тоҥон көрдө, аныгы кэм ирдэбилинэн экспозициялар саҥардыллыахтаахтарын, чуолаан үүнэн иһэр эдэр көлүөнэ интэриэһин тардарга үлэ барыахтааҕын бэлиэтээтэ. Саха чулуу дьонун өлбөөдүйбэт үлэлэрэ, кэм сүүрүгэр симэлийбэккэ, кэлэр көлүөнэҕэ тиэрдэр сыаллаах-соруктаах ситимнээх үлэ барыахтаах диэтэ.

Музей сэбиэдиссэйэ М.Г. Аржаков ыалдьыттарга экспозициялары көрдөрдө, быйылгы үбүлүөйдээх  сылга ыытыллар үлэлэри, бырайыактары сырдатта. Манна даҕатан эһиил Платон Алексеевич төрөөбүтэ 130 сылын көрсө музей концепциятыгар сөп түбэһиннэрэн, экспозицияны саҥардыыга Ил Түмэн өттүттэн күүс-көмө, өйөбүл буолалларыгар туруоруста. Алексей Ильичка эппиэтинэстээх үлэтигэр ситиһиини баҕаран туран, музей специалиһа М.Е. Барахова «Саха төрүт өйдөбүллэрэ» авторскай кинигэтин бэлэх уунна.

С.ХАЛГАЕВА