Үөһээ Бүлүү улууһун Аҕа Баһылыга Валерий Валерьевич Николаев 2025 сыл муус устар 25 күнүнээҕи №1-РГ дьаһалынан улууска ыам ыйын 7 күнүн «Дьоруойдар күннэринэн» биллэрбитэ.

Бу күн улуус үрдүнэн Арассыыйа дьоруойа Алексей Петров – Медведь сырдык аатыгар сүгүрүйэн «Дьоруой сардаҥата» диэн аахсыйа ыыттылынна. Тэрээһин чэрчитинэн Харбалаах нэһилиэгэр баар И.Н. Барахов аатынан Саха Өрөспүүбүлүкэтин судаарыстыбатын музейыгар тус сыаллаах байыаннай дьайыыга сылдьыбыт буойуттарга аналлаах саалаҕа Дьоруой Алексей Рафаэлович Петровка анаан чүмэчи уматан, биир мүнүүтэ сүһүөхпүтүгэр чуумпуран туран сүгүрүйдүбүт.

Ол кэннэ музей экскурсовода Владимир Семенов Алексей Петров олоҕун, бойобуой сырыыларын, хорсун кыргыһыыларын, дьоруойдуу быһыытын туһунан сиһилии кэпсээтэ. Салгыы оҕолор нэһилиэк библиотекатыгар баран «Дьоруой долбуура» акция арыллыытыгар кыттыыны ыллылар.