Бу күннэргэ төрөөбүт тыл уонна сурук-бичик күнүн көрсө П.А.Ойуунускай аатынан Судаарыстыбаннас музейыгар “Дьулуруйар Ньургун Боотур” олоҥхотун сюжеттарынан Таатта улууһун художественнай кылаастарыгар үөрэнэр оҕолор уруһуйдарын быыстапката аһылынна.

Уруһуй күрэхтэһиитин Судаарыстыбаннас музейын специалиһа М.Е.Барахова уонна Ф.С.Аргунов аатынан Ытык Күөллээҕи искусство оскуолатын уруһуй кылааһын учуутала С.К.Билюкина иилээн-саҕалаан тэрийдилэр. Куонкуруска барыта 24 үлэ киирдэ. Улууспутугар баар Уус Таатта, Баайаҕа, Ытык Күөл уонна Чөркөөх художественнай кылааһын үөрэнээччилэрэ кыттыыны ыллылар.

Быыстапка түмүгүнэн кыайыылаахтар ааттаныахтара, онтон эдэр худуоһунньуктарга биһирэбил миэстэни Чөркөөх орто оскуолатын үөрэнээччилэрэ куоластаан быһаарыахтара.

Платон Ойуунускай айар үлэтин баараҕай чыпчаала буолбут, ЮНЕСКО материальнайа суох нэһилиэстибэтинэн билиммит “Дьулуруйар Ньургун Боотур” олоҥхо геройдара сүүрбэ биирис үйэ эдэркээн худуоһунньуктарын айымньыларыгар тиллэн кэллэ.

Светлана Халгаева