Саха дьонугар чороон былыр-былыргыттан көннөрү кымыс кутар эрэ буолбакка, сиэргэ-туомҥа туттуллар дириҥ ис хоһоонноох иһитинэн ааҕыллар. Уустар чороону чочуйан таһааралларыгар эҥин араас суолталаах оһуору тутталлар. Билиҥҥи кэмҥэ төрүт уус-уран оҥоһуктар дьиҥ аналларын туһунан дьоҥҥо-сэргэҕэ кэпсиир, үйэтитэр сыал-сорук турар. Бу тула Дьокуускай куоракка норуот маастардара уонна этнографтар “Чороон толору анала” төгүрүк остуолга сэһэргэстилэр.
Бэс ыйын 11 күнүттэн Ем. Ярославскай аатынан Хотугу норуоттар устуоруйаларын уонна култуураларын холбоһуктаах судаарыстыбаннай түмэлигэр “Үйэлээх чороон – өбүгэм ситимэ” быыстапка күн бүгүнүгэр диэри үлэлии турар. Манна саха улуу маастардарын үлэлэрэ, өрөспүүбүлүкэ түмэллэриттэн сэдэх чорооннор, аныгы оҥоһуктар дьон болҕомтотугар көрдөрүүгэ тураллар. Түөрт ый устата быыстапкаҕа 9,5 тыһыынча киһи сылдьыбыт. Быыстапканы Саха сирин олохтоохторо эрэ буолбакка, аан дойду араас муннуктарыттан ыалдьыттар кэлэн сэргээн, көрөн барбыттар.
Бырайыак ааптарынан “Сахабэчээт” хампаанньа иһинэн үлэлиир “Саха сирэ” сайт таһаарааччы редактора, суруналыыс Сардаана Баснаева буолар. Кини түмэллэри, научнай үнүстүүттэри, библиотекалары кытта үлэлэспитэ хас да сыл буолбут. Быыстапканы тэрийэргэ норуот маастардара, уустар эмиэ көмөлөспүттэр.
Бырайыак туһунан сиһилии сырдатта Сардаана Баснаева.
Бу курдук, чороон билиҥҥи кэмҥэ диэри уус-уран оҥоһук быһыытынан эрэ буолбакка, өбүгэ ситимэ, норуот өйүн-санаатын, сиэрин-туомун сүгэр бэлиэтэ диэн төгүрүк остуол кыттыылаахтара бэлиэтээтилэр.