Муус устар 27 күнэ – бу биһиги төрөөбүт хотугу кыраайбыт дьылҕатын быһаарбыт улахан историческай суолталаах күн.  1922 сыллаахха муус устар 27 күнүгэр Арассыыйа састаабыгар Саха Автономнай Советскай Республикатын тэрийэр туһунан Декреккэ илии баттаныллыбыта. Устуоруйа холугар бэрт кылгас кэм иһинэн Саха сирэ сайдыылаах бырамыысыланнастаах, тыа хаһаайыстыбалаах өрөспүүбүлүкэҕэ кубулуйбута. Уопсай үөрэхтээһин, култуура үрдүк таһыма хас биирдии киһи духуобунай баайынан буолбута.

Биһиги бу үөрүүлээх күн саха норуотун уһулуччулаах государственнай уонна политическай диэйэтэллэрин: Максим Кирович Аммосовы, Исидор Никифорович Бараховы, Былатыан Алексеевич Ойуунускайы, Степан Максимович Аржакову, Степан Васильевич Васильевы ааттыыр, өйдүүр, кэриэстиир эбээһинэстээхпит.

Тапталлаах Өрөспүүбүлүкэбит күнүн көрсө Саха сирин уһулуччулаах диэйэтэлэ И.Н.Барахов төрөөбүт дойдутугар Үөһээ Бүлүү улууһун Харбалааҕар өрөгөйдөөх миитин буолла. Өрөгөйдөөх миитиҥҥэ кыттыыны ыллылар: СӨ бырабыыталыстыбатын Бэрэссэдээтэлин солбуйааччы М.Д.Гуляев, СӨ Ил Түмэн Судаарыстыбаннай мунньаҕын Бэрэссэдээтэлин солбуйааччы О.В.Балабкина, СӨ успуордун миниистирин солбуйааччы С.С.Чердонов, СӨ архитектура уонна тутуу комплексын миниистирин бастакы солбуйааччыта П.А.Аргунов, СӨ доруобуйаҕа харыстабылын миниистирин солбуйааччы Л.И.Вербицкая, СӨ Ил Түмэн Судаарыстыбаннай мунньаҕын депутата М.С.Филиппова, «Үөһээ Бүлүү улууһа» МО баһылыга В.С. Поскачин, “Харбалаах нэһилиэгэ” МТ баһылыга И.И.Кузьмин, Үөһээ Бүлүү улуус олохтоохторо  уонна Харбалаах нэһилиэгин дьоно-сэргэтэ.

Эҕэрдэ тыл кэннэ Ньурба улууһун Дьаархан, Таркаайы нэһилиэктэрин былааҕа уонна дьаралыга РФ Государственнай геральдическай регистригэр  регистрацияламмытын туоһулуур Сибидиэтэлистибэ туттарылынна.

Уһулуччулаах государственнай уонна политическай диэйэтэл И.Н.Барахов мэҥэ тааһыгар тыыннаах сибэкки дьөрбөтүн ууруу кэннэ ытык-мааны ыалдьыттар, миитин кытыылаахтара И.Н.Барахов аатынан СӨ судаарыстыбаннаһын түмэлин көрдүлэр. Экскурсияны Н.Г.Золотарев-Якутскай аатынан Харбалаах орто оскуолатын «Уолан» уолаттар түмсүүлэрэ ыытта.

«Таптыыбын Сахам сирин!» диэн ааттаах эҕэрдэ концерка мустубут ыалдьыттар сүһүөххэ туран ,«Бараахап туһунан ырыаны» ыллаатылар.

Эйигин Россия сууллубат сорҕотун,

Ытыктан ытык сирбитин,

Тапталлаах Өрөспүүбүлүкэбитин

Айхаллыыбыт эҕэрдэлиибит

Эн кэрэ, эн сырдык, эн модун бэйэҕин.

Е.П. Семенова,

И.Н. Барахов аатынан СӨ судаарыстыбаннаһын түмэлин улэьитэ