Сайын оройунан ааттанар Бөтүрүөп таҥаратын күнүгэр Таатта улууһун кырдьаҕас Чөркөөҕөр үтүө күн буолан ааста. Саха историятыгар биир биллэр ааттаах-суоллаах, урукку дьыл мындаатыгар олорон ааспыт, Боотуруускай улуус биллэр бас-көс тойоно, 700-кэ сүөһүлээх баай Нээстээр Силэпсиэп сыдьаана предприниматель Семен Егоров сибэтиэй Троица таҥара дьиэтэ акылаата түһүөхтээх сиригэр сиэри-туому ыыттарда.

Бу күн Дьокуускайдааҕы Епархияттан отец Сергий, отец Александр кэлэн сибэтиэй уунан ыстаран сиэр-туом оҥордулар. Саҥа таҥара дьиэтэ Чөркөөххө киирэр аартыкка, «Алгыс» кафе аттыгар дьэндэйиэҕэ. Федеральнай суолунан ааһар ыраах-чугас айанныыр айанньыттарга үтүө алгыһынан арчылыы, харыстаһа туруоҕа. Маны таһынан Семен Арасталович  хос хос эһэтэ Нээстээр Силэпсиэп диэн кыахтаахтык, байан-тайан  олорбут Тохтобул Көөдүгэр балаҕанын, дьиэтин-уотун тилиннэриэҕэ. Манна саха дьоно тохтоон ааһар, историяҕа тиһиллибит, саха кыахтаах киһитэ олорбут  сирин-дойдутун, дьиэтин-уотун көрөр кыахтаныахтара. Нээстээр Силэпсиэп хаан-уруу быраатынан Былатыан Ойуунускай буолар. Кырачаан Былатыан Көөдүккэ үгүстүк тилийэ сүүрбүт-көппүт сирэ-дойдута.

Семен Арасталович дьонун-сэргэтин ортотугар улахан бочуоттаах сүгэһэри ылынан, кэмигэр туттаран силигин-ситэриэ диэн эрэнэбит. Бу күн Нээстээр Силэпсиэп сыдьааннара Семен Арасталович Егоров, Егор Егорович, Ельфидифор Егорович, кийиит Изабелла Яковлевна Жерготовтар таҥара үлэһиттэрин кытта тэҥҥэ сылдьан сири-уоту көрдөрөн, сибэтии гынарга көмөлөстүлэр.

Тэрээһиҥҥэ Чөркөөх политссыылкатын сэбиэдиссэйэ Н.Е.Попов, маны тэҥэ Дьокуускай куораттан Тыараһа Түөйэтин таҥаратын дьиэтин аҕабыыта Василий Мухин хос хос сиэнэ Николай Мухин кыттыыны ыллылар. Салгыы таҥара үлэһиттэрэ Ытык Күөлгэ протоирей Димитриан Попов хос хос сиэнэ Александр Шарины кытары көрүстүлэр.

Манна даҕатан бэлиэтээтэххэ, Чөркөөххө турар Николаевскайдааҕы таҥара дьиэтин туттарыыга төһүү күүһү, кэпсэтиитин, үбүнэн-харчынан да балачча көмөнү Нээстээр Силэпсиэп  оҥорбута диэн хас биирдии киирэр ыалдьыкка кэпсэнэр. Онон Чөркөөх музейыгар баар үктэтии миэлиҥсэ курдук, хас хардыыта, история эргийиитэ аттыбытыгар баар дьонунан оҥоһуллар. Онтон үтүөнү оҥорбут киһи аата үйэлэргэ сууйуллубат.

С.ХАЛГАЕВА

Хаартыскаларга: Чөркөөххө тутуллуохтаах храм сирин уонна Нээстээр Силэпсиэп олоҕун сөргүтүүгэ бастакы кирпииччэ ууруллуутун түгэннэрэ.