Бу күннэргэ Таатта улууһугар “Олоҥхо сатабыла” этнокультурнай тэрээһин нэдиэлэтэ ыытыллар. Кулун тутар 2 күнүгэр улуус үрдүнэн сылын аайы Олоҥхо күнэ бэлиэтэнэр. Олоҥхо күнүн көрсө олунньу 27 күнүгэр кырдьаҕас Чөркөөх олохтоохторун аһатан-сиэтэн олорор Мындайбан эбэҕэ Б.Неустроев-Мандар Уус «Биэс харахтаах харысхал» бэлиэтин хаарга түһэрии сиэрэ-туома оҥоһулунна. Бу тэрээһиҥҥэ Чөркөөх тэрилтэлэрин үлэһиттэрэ, түмсүүлэрэ сахалыы таҥастаах тахсан ыраас хаарга ойуу-мандар түһэрдилэр. Эбэ иччититтэн көҥүл ылар алгыс сиэрэ оҥоһулунна. Маҥан хаарга түспүт харысхал бэлиэтин киэҥ эйгэҕэ кулун тутар 2 күнүгэр таһаарыахтара.

«Ойуу тыла – харысхал бэлиэтэ үөһэттэн көрөргө дьикти үчүгэй буолла»(үөһээттэн дронунан уһулунна), – диэтэ тэрийээччилэртэн биирдэстэрэ П.В.Толстяков аатынан народнай театр режиссера М.П.Яковлева.

Светлана Халгаева