Д.К. Сивцев – Суорун Омоллоон төрөөбүтэ 120 сылын уонна Чөркөөх музейа төрүттэммитэ 50 сылын көрсө музей үлэһиттэрэ былырыын уонна быйыл нэһилиэнньэлэргэ тахсан көрсүһүү, кэпсэтии оҥорбуттара.

Быйыл Туора-Күөлгэ Протодьяконов М.А. салайааччылаах Чөркөөх музейын үлэһиттэрэ нэһилиэнньэни кытта көрсүбүттэрэ. Эрдэ Дьүлэй нэһилиэгиттэн элбэх мал, дьиэ-уот көһөрүллэн кэлбитэ. Оччолорго нэһилиэк болҕомто ууран, Олег Дмитриевич салалтатынан элбэх киһилээх кэпсэтии буолбута. Ол түмүгэр Егор Кузьмич Щукин – Бурҕаат Уус, оччолорго Д.К. Сивцев – Суорун Омоллоон этиитин ылынан П.А. Алексеев балаҕанын оригиналын көһөттөрбөккө, үкчү копиятын оҥорбута. Бү үйэ аҥара буолла да, үчүгэй туруктаах турар. Бу быйылгы дьыллаахха оҕолоро-сиэннэрэ ол этиитин ылынан “биһиги эһэбит үлэлээбит экспозициятын байытыахпыт, көрүҥүн тупсарыахпыт этэ” диэн баҕа санааларын эппиттэриттэн сүрдээҕин үөрбүппүт.

Ол тылларын мээнэ тыалга көтүппэккэ бүгүн Чөркөөх сиригэр илии тутуурдаах, өттүк харалаах Егор Кузьмич Щукин – Бурҕаат Уус кыыһа Туора-Күөл төрүт олохтооҕо Елена Егоровна Аянитова, кэргэнэ Матвей Матвеевич Аянитов, убайын улахан кыыһа Саргылаана Ивановна, чугас аймахтара, сыдьааннара кини оҥорбут балаҕаныгар бэлэх уонна эһэлэрин Щукин Егор Кузьмич олоҕун, үлэтин сырдатар стендэ биэрдилэр.

Ю. Борисова