Үөһээ Бүлүү Харбалааҕа нэһилиэги тэниппит 14 герой ийэлэринэн киэн туттар.
Быыбары көрсө бу күннэргэ нэһилиэктээҕи сынньалаҥ Киинигэр ураты выставка арыллан үлэлии турар. Бу кумааҕыны быһан ойуу түһэрэр ньыманан оҥоһуллубут хартыыналар автордара Муксуун аҕа ууһуттан силистээх Муксунов Алексей Петрович уонна ыал ийэтэ Анна Афанасьевна 10 оҕолоруттан биирдэстэрэ Муксунов Петр Алексеевич, дьоно-сэргэтэ ааттыылларынан Бүөчүккэ буолар.
Бүөчүккэ элбэх кыыс оҕо кэннэ төрөөбүт кэтэһиилээх уол буолан аҕатын уола этэ. Ыал аҕата Алексей Петрович үйэтигэр трактортан түспэтэх, Барахов аатынан совхуос отделениетын биир сүрүн механизатора этэ. Хаһан да кыыһырары билбэтэх, сытыары сымнаҕас Өлүөскэ киэһэ үлэтиттэн дьиэтигэр киирдэ да Бүөчүккэтинээн көтөхсөн олорон сыллаһан ахтылҕаннарын таһаараллара. Ыал ийэтэ Ааныска олох эдэригэр хомолтолоохтук күн сириттэн күрэммитэ. Онон ыал аҕата сии кырбас оҕолорун балыһа Шура көмөлөһөн атахтарыгар туруортаабыта.
Бүөчүккэ бу сөбүлүүр дьарыгын түмүктэрэ кумааҕынан кырыйыы графикатын (силуэтное вырезание из бумаги) ньыматынан оҥоһуллан тахсыбыт хартыыналар. Маннык ньыма дьоппуон омукка киригами диэн ааттанар.
Бэрт элбэх хартыыналар ыйаммыттар. Манна түүлэрэ илэ көстөр курдук нарыланан быһыллыбыт араас кыыллар, эҥкилэ суох кырыллыбыт нарын линиялар билэр дьонуҥ, геройдарыҥ образтарын тилиннэрэллэр. Манна бааллар Джекки Чан, Виктор Цой, Джонни Депп, Брюс Ли уо.д.а.

Бу хартыыналарын Бүөчүккэ Эбээн Бытантайга кыстаабыт уһун кыһыннарыгар оҥортообут (бииргэ төрөөбүттэриттэн Нина диэн эдьиийэ наһаа үчүгэйдик уруһуйдуура. Кини кумааҕы куукулалары кырыйан, араас таҥас эгэлгэтин уруһуйдаан, кырыйан кыра кыргыттарга бэлэхтээн үөрдүтэлиирэ. Үксүн Барби курдук муода сурунаалын кыргыттарын оҥороро).
Бу ураты выставканы көрбүт эрэ бары сэҥээрэн, сөҕөн-махтайан, Бүөчүккэҕэ инникитин саха норуотун чулууларын, биир дойдулаахтарын дьүһүннэрин оҥорон үөрдэрэ буоллар диэн баҕа санааларын тириэрдэллэр.

С. Копыленко