Чөркөөх музейыгар от ыйын 14 күнүгэр Чөркөөхтөн төрүттээх, билигин Дьокуускай куоракка олорор үлэ уонна тыыл бэтэрээнэ Н.С. Кириллин «Холкуостаах Ньукуу сэhэнэ» диэн Таатта улууhун олоҕун, сэбиэскэй былаас саҕана Чөркөөх уонна Тана ыаллара – барыта 19 ыал бэйэлэрин үптэрин-астарын, баайдарын-дуолларын холбоон «Бойобуой» диэн холкуос буолбуттарын, коллективнай хаhаайыстыба тэринэн уоттаах сэрии, умайар уот кураан сылларыгар хайдах үлэлээбиттэрин- хамнаабыттарын туhунан суруйбут кинигэтэ ааҕааччы киэӊ эйгэтигэр тахсыбытын бэлиэтиир тэрээhин буолан ааста.

Саӊа кинигэ биhирэмигэр ааптар төрөппүт кыргыттара – нуучча тылын учуутала Питимко Антонина Петровна, биолог идэлээх Ноговицына Саргылана Николаевна, сиэн уола, кадастровай инженер идэлээх, ХИФУ преподавателэ Кириллин Аркадий Станиславович, музей салалтата иилээн-саҕалаан Октябрьскай нэhилиэк дьоно-сэргэтэ кыттыыны ыллылар. Билигин 93 саастаах саӊа кинигэ ааптарын – Саха Өрөспүүбүлүкэтин тыатын хаhаайыстыбатын туйгуна, Саха Өрөспүүбүлүкэтин Агропромкомплексын Бочуоттаах үлэһитэ Кириллин Николай Семеновиhы Таатта улууhун баhылыга Соров М.М. улаханнык бочуоттаан эҕэрдэлээтэ. Бу кинигэ тахсарыгар үбүнэн-харчынан көмөлөспүт олохтоох Октябрьскай нэhилиэк баhылыга Семенов А.П. бэйэтин эҕэрдэтигэр дойдутун убаhатын сертификатын туттаран үөртэ, кинигэҕэ суруллубут «Бойобуой» холкуос үлэhиттэрин ыччат дьоно Богатырев Р.Р., Протодьяконов М.А., Кычкина П.Ф., Охотина Т.Е. холкуостаах дьоннорун туhунан тугунан да суоруллубат үйэлээх үлэ оӊоhуллубутун бэлиэтээн ис сүрэхтэриттэн махтаннылар. Ордук Михаил Александрович Протодьяконов этиитэ долгутта, ол курдук Николай Семенович куруук бойобуойдары ахтарын, кинилэр ыччаттарыгар, чуолаан эрдэ тулаайах хаалбыт кини ийэтигэр Татьяна Никитичнаҕа аҕалыы амарахтык сыhыаннаhарын, оччолорго үлэhит киhи Михаил үс саастааҕар 3 көлүөhэлээх велосипед атыылаhан биэрбитин, кэлин саа бэлэхтээбитин ахтан киhи буоларбар алҕаабытын диэн бэйэтин уонна бары Бырдьахаанаптар ааттарыттан махтанна. Ону сэргэ хаан-уруу-аймах дьоно, Таатта улууhун тэрилтэлэрин үлэhиттэрэ Жерготова И.Я., Вырдылина А.В., Охотина М.А., Мандарова Т.Е., Климова С.С. од.а. саӊа кинигэ тула санааларын үллэстэн истиӊник – иhирэхтик кэпсэттилэр.

Онтон кинигэ ааптара Н.С.Кириллин – Холкуостаах Ньукуу: – Оҕо сылдьан оҕус сиэтиититтэн саҕалаан үлэлээн улааппыт «Бойобуой» колхуоһум туһунан, араас сут-сутурҕан, уодаһыннаах уоттаах сэрии чычырбас сылларыгар хайдах олорбуппутун, үлэлээбиппитин эппинэн – хааммынан билбит киһи буоламмын өйбөр туох хатанан хаалбытынан уонна Бэс Дьарааһын “Бойобуой”, суруналыыс Е.И.Софронова “Тыыл хорсун үлэһиттэрэ кыайыыны уһансыбыттара”, Чөркөөхтөр “Чөркөөх” диэн кинигэлэригэр, оччотооҕу оройуон «Коммунист» хаhыатын, сэбиэтин, Земкэмитиэтин отчуоттарыгар, Дьокуускайдааҕы Национальнай архыып докумуоннарыгар олоҕуран суруйдум. Кинигэм тахсарыгар өйөөбүт-көмөлөспүт дьоммор, чуолаан олохтоох дьаhалта баhылыгар Семенов А.П., уолум тэӊэ Богатырев Р.Р., музей специалиhыгар Жерготова И.Я. махталым улахан, – диэн санаатын үллэhиннэ.

«Бойобуой» холкуос олоҕун туhунан чахчылар «Холкуостаах Ньукуу сэhэнэ» кинигэттэн

Бу күн «Бойобуой» холкуос олоҕун сырдатар быыстапка улахан сэӊээриини ылан тэрээhин кыттыылаахтарын долгутта.
Музей коллектива биир дойдулаахпытыгар, ытык мааны киhибитигэр Н.С.Кириллиӊӊэ, кини иллээх дьиэ кэргэнигэр барҕа махталбытын тиэрдэбит.

Видеоны көрөргүтүгэр ыӊырабыт.

«Бойобуой» холкуос олоҕун сырдатар видеоны Н.С.Кириллин –Холкуостаах Ньукуу кинигэтиттэн уонна Д.К. Сивцев – Суорун Омоллоон түhэрбит хаартыскаларыгар олоҕуран музей специалиhа Аввакумова С.В. таӊан оӊордо.

Быыстапканы оӊордулар Ушницкая Е.И., Аввакумова С.В., Жерготова О.В., Жерготова И.Я., Гоголева Н.М., Дмитриева А.В., Аржакова Л.М., Яковлев В.В. Техническай өттүн хааччыйдылар Прохоров М.М., Анисимов Г.А.

Бэлэмнээтэ Изабелла Жерготова.
Чөркөөх. От ыйын 16 күнэ. 2021