Бу сыл кулун тутар 10 күнүгэр Таатта улууһугар Саха Республикатын Государственнай мунньаҕын Ил Түмэн депутаттарын делегацията спикер П.В.Гоголев салалтатынан кэллилэр.

Депутаттар Таатта улууһугар икки күн үлэлиэхтэрэ. Олохтоохтору кытары рабочай көрсүһүүлэр, производственнай объектарга сылдьан үлэни-хамнаһы кытары билсиэхтэрэ. Бастакы күн сарсыардаттан Чөркөөххө кэлэн олохтоох салалтаны кытары элбэх функциялаах культура дьиэтэ тутуллар үлэтин хаамыытын тула кэпсэттилэр, Чөркөөх орто оскуолатыгар сылдьан үөрэнээччилэри, учууталлары кытары көрүстүлэр. Салгыы П.А.Ойуунускай аатынан Судаарыстыбаннас музейыгар сылдьан Петр Васильевич Гоголев оскуола үөрэнээччилэрин кытары Платон Алексеевич суруйбут “Сүүс сыллаах Улуу былаан” кэпсээнин тула талах олоппосторго атах тэпсэн олорон ырыттылар. Платон Алексеевич бу сүүс сыл иһигэр буолуохтаах уларыйыылара төһө туолбуттарын, аны сүүс сылынан олохпутугар туох саҥа сүүрээннэр киириэхтэрин сөбүн туһунан билиҥҥи кэм оҕолоро , Платон Алексеевич биир дойдулаахтара кэпсээтилэр, санааларын эттилэр. Өскөтүн Платон Алексеевич олоҥхо кэпсээнигэр суруллубут “…нэһилиэк нэһилиэк аайы телефонунан кэпсэтэр буолуохпут… Уон хонукка оҕуһунан, атынан сылдьар сырыыбытын уон чааһынан сылдьар буолуохпут, дьэргэлгэн курдук көтүөхпүт, холорук курдук атыллыахпыт”, – диэн тиһиллибитэ билигин барыта сүүс сыл иһигэр туолла. Ойуунускай билиҥҥи биир дойдулаахтара “Аны сүүс сылынан быраас солото суох буоллаҕына, уустук эппэрээссийэни робот толоруоҕа, атын планеталарга холкутук күүлэйдии барыахпыт”, – диэн уонна да атын баҕа санааларын эттилэр.

Салгыы делегация П.А.Ойуунускай төрөөбүт алааһыгар “Дэлбэрийбиккэ” сылдьан мэҥэ өйдөбүнньүккэ тыыннаах сибэкки дьөрбөтүн ууран, төрөөбүт балаҕаныгар тохтоон, сүгүрүйэн аастылар.

Светлана Халгаева