Муус устар 8 күнүгэр Саха АССР төрүттэммитэ 100 сылын көрсө  СӨ Духуобунаһын  академията  «Платон Ойунский. Сокровенные истории» П.А.Ойуунускайга аналлаах документальнай киинэ сүрэхтэниитэ Былатыан Ойуунускай төрөөбүт дойдутуттан саҕаланна.

Кини аатынан Судаарыстыбаннас музейыгар кырдьаҕас Чөркөөх олохтоохторо документальнай киинэ премьератын  көрдүлэр. Киинэ премьератыгар автор, «Саха» НКИХ редактора Евдокия Избекова, режиссер Галина Раевская, кинини кытта кэлсибит суруйааччы Елена Слепцова- Куорсуннаах, СӨ Духуобунас академиятыттан Валентина Бочонина, учуонай Егор Антонов уо.д.а. кыттыыны ыллылар. Бу күн Чөркөөхтөөҕү политссыылка музейыгар үлэлэрин сүнньүнэн кэлбит ыалдьыттар, Ил Түмэн  депутаттара Михаил Гуляев, Яков Ефимов түбэһэ кэлэн киинэни тэҥҥэ көрсөн, санааларын эттилэр. Редактор Евдокия Избекова: «Документальнай киинэ ыччакка, үүнэр көлүөнэҕэ ананарын,  сүрүн күлүүһэ: Олоҥхо, Таатта, Ойуунускай буолар», – диэтэ. Олоҥхоһут Табаахырап уобараһа биир сүрүн өйдөбүл быһыытынан киирбитин эттэ. Биир дойдулаахпыт Елена Слепцова-Куорсуннаах таһымнаах киинэ оҥоһуллубутун, научнай өттүнэн учуонайдар санаалара киирэн биэрбитэ олус байыппытын, буолбут историческай кэми миэстэтигэр ууран биэрдэ диэн бэлиэтээтэ. Сүрүннээн киинэни сөбүлээбиттэрин, кэмигэр тахсыбытын уонна өссө да салгыы Ойуунускай туһунан киинэ тахсарыгар  баҕа санааларын депутат Михаил Гуляев, Чөркөөхтөөҕү политссылка музейын сэбиэдиссэйэ Николай Попов, Ойуунускай аатынан Судаарыстыбаннас музейын сэбиэдиссэйэ Михаил Аржаков, учуутал Эмма Кашкина, олохтоохтортон Варвара Мурунова, ыалдьыттар Валентина Бочонина, Галина Раевская  уо.д.а. эттилэр. Бу курдук биир тыынынан саха чулуу уолун, биир дойдулаахпыт, Саха судаарыстыбаннаһын олохтообут Былатыан Ойуунускай туһунан документальнай киинэни өрөйөн-чөрөйөн олорон көрдүбүт. Манна даҕатан бэлиэтээн аастахха, киинэ сүрүн геройун Былатыан Ойуунускайы, Чөркөөх уола, «Сахатеатрын» артыыһа Роман Дорофеев уһуллан киинэ бары өттүнэн чөркөөхтөргө олус чугас, күндү буолла.

Режиссер Евдокия Избековаҕа Октябрьскай нэһилиэк баһылыга Андрей Семенов махтанан туран «Октябрьскай нэһилиэк сайдыытыгар кылаатын иһин» нэһилиэк үрдүк наҕараадатын туттарда.

С.Халгаева

Хаартыскаларга: «Платон Ойунский. Сокровенные истории» документальнай киинэ сүрэхтэниитигэр