Сэтинньи 1 күнүгэр уһун ыарахан ыарыыттан, онуоха эбии хамсык эбиискэ буолан биллилээх кыраайы үөрэтээччи, музеевед, историческай наука кандидата Петр Васильевич Винокуров бу олохтон туораата. Кэбээйиттэн төрүттээх Петр Васильевич 1974 с. СГУ историческай салаатын ситиһиилээхтик бүтэрэн Ем. Ярославскай аатынан кыраайы үөрэтэр музейга үлэлии киирбитэ, бэрт сотору бэртээхэй үлэһити музей сэбиэскэй отделын биллиилээх краевед, музеевед С.Н. Сизых салайан кэлбитэ. Мин 1976 с. музей директорынан ананан үлэлии кэлэрбэт дойду үрдүнэн музейдар саҥа таһымҥа тахсар кэмнэрэ этэ. “Правда” хаһыакка Владимиро-Суздальскай холбоһуктаах музейын опытын хайҕаан суруйан, директордара А. Аксенова Государственнай премия лауреата буолан, Советскай Союз үрдүнэн холбоһуктаах музейдары тэрийтэлээн барбыттара. Сэбиэскэй отдел үлэлэрин Бүтүн Союзтааҕы көрүүгэ II миэстэ буолбута, холбоһуктаах музей тэриллэн үгүс оройуоннар, улуустар музейдарын экспозицияларын саҥалыы оҥорууга үгүс сыратын биэрбитэ. Ем. Ярославскай музейыгар олох, саҥалыы көрүүнэн, көрөөччүлэр биһирэбиллэрин ылбыт экспозиция турбута, музейбыт саҥа таһымҥа тахсыбыта. Петр Васильевич билиигэ-көрүүгэ тардыһыылаах кыраайы үөрэтээччи буолан, музейбыт баай коллекцияларын дьаныардаахтык үөрэтэн республикабытыгар биир бастакынан научнай-популярнай хабааннаах ыстатыйалары, кинигэлэри суруйталыыр буолбута, сыыйа элбэх кинигэлэри суруйталыыр буолбута, сыыйа элбэх кинигэлэри бэчээттээбитэ. Саха сиригэр кыраайы үөрэтии, музейдар историяларын үөрэтэн диссертация суруйбута, ситиһиилээхтик көмүскээбитэ. Омук сирдэригэр мунньуллубут Саха сирин коллекцияларын үөрэппитэ, ыстатыйа суруйбута. Ону билигин туһаналлар да, кини-аатын, ыстатыйатын, хомойуох иһин, ахтыбаттар.

М.К. Аммосов 80 сааһын туоларыгар Дьокуускайга кини олорбут дьиэтин көһөрөн, музей тэрийэргэ обком уурааҕа тахсыбыта. Элбэх үлэ ыытыллыбыта. Биһиги Петр Васильевичтыын тематико-экспозиционнай  былаанын суруйбуппут, эбии материал хомуйбуппут (партиялаах буолан партийнай архивка мин үлэлээбитим), экспозициятын оҥорбуппут. Бу үлэлэргэ барытыгар Петр Васильевич уҥа илиим, соратнигым этэ.

Ити сылларга дойду киин куораттарыгар, омук сирдэригэр аан маҥнай быыстапкалары оҥортообуппут. Итилэргэ барыларыгар Петр Васильевич быһаччы кыттыбыта, сорохторугар сылдьыбыта.

Петр Васильевич дириҥ биллиилээх, музей үлэтин теориятын, методикатын, практикатын үчүгэйдик билэр, улахан авторитеттаах “музейщик этэ”. Кэлин “Краеведы Якутии” диэн 2 томнаах биобиблиографическай справочнигы Россияҕа бастакынан хомуйан, оҥорон таһаарбыппыт, улахан биһирэбили ылбыппыт. Профессор Ф.Г. Сафронов таһаарбыт “История Якутии” энциклопедиятыгар музейдар тустарынан материаллары Петр Васильевич суруйбута, оҥорбута. Профессор суруйарын хайгыыр этэ.

Петр Васильевич музей ыытар үлэлэригэр өрүү көхтөөхтүк кыттара. Бэртээхэй отчут, дуобакка бэркэ оонньуура, Валерий Ноев, “Хатыҥчааным барахсан”, кэргэним быраата Иннокентий Сивцев “Тэтиҥнэрим” диэн ырыаларын сөбүлээн ыллыыра.

Олус сэмэй майгылааҕа, саҥата-иҥэтэ суох буолара, музейга олус бэриниилээҕэ.

Күндү үөлээннээҕим, биир өйдөөх-санаалаах соратнигым, биир бастыҥ үөрэнээччим Петр Васильевич быдан дьылларга бырастыы! Биһиги Эйиигин умнубаппыт, сүрэхпитигэр илдьэ сылдьабыт.

Егор Шишигин,

Саха музейын сүрүн научнай үлэһитэ,

музей урукку директора,

Россия музейдарын Союһун Президиумун бочуоттаах чилиэнэ,

РФ, СР култуураларын үтүөлээх үлэһитэ