Судаарыстыбаннас күнэ Үөһээ Бүлүү улууһун Харбалаах нэһилиэгэр уһулуччулаах судаарыстыбаннай уонна бэлитиичэскэй диэйэтэл Исидор Никифорович Барахов мэҥэ тааһыгар тыыннаах сибэкки дьөрбөтүн уурууттан саҕаланна. Кыттыыны ыллылар СӨ баһылыгын дьаһалтатын уонна бырабыыталыстыбатын салайааччыта Георгий Михайлов, Үөһээ Бүлүү улууһун баһылыгын солбуйааччы Егор Иванов, улуус депутаттарын Сэбиэтин бэрэссэдээтэлэ Николай Николаев уонна общественность.

Салгыы И.Н. Барахов аатынан СӨ судаарыстыбаннаһын музейыгар сырыттылар. Экскурсияны Семенов В.И. ыытта. Аптаныамыйаны ылыныыга, кырасдааныскай сэрии сылларыгар И. Барахов өҥөтүн, Саха сирэ сайдарыгар далааһыннаах үлэтин сэҥээрэ иһиттилэр.

Салгыы Судаарыстыбаннас күнүгэр аналлаах өрөгөйдөөх мунньах ыытылынна. Мунньахха дьон-сэргэ тоҕуоруйа муһунна. Судаарыстыбаннас сайдарыгар кылааттарын киллэрбит дьоммут ааттарын ааттыыр, саха омугун сомоҕолуур бэлиэ күн буоларын тыл эппит дьон бэлиэтээтилэр.

Бу күннэргэ музейбытыгар үгүс киһи сырытта. Ол курдук улууспутугар соторутаахха арыллыбыт медицинскэй колледж отделениетын устудьуоннара кэлэн-көрөн истэн бардылар. Н. Якутскай аатынан Харбалаах орто оскуолатын 2 кылааһын үөрэнээччилэрэ (учуутал Семенова А.А.), төһө да курулас ардах кута турбутун үрдүнэн, И. Барахов туһунан билиилэрин хаҥатыннылар. Уонна күүтүүлээх дьоннорбут – уһуйаан иитиллээччилэрэ, бэлэмнэнии бөлөхтөрө, (иитээччилэр Туманова П.А., Кардашевская Р.Н.) киирэ сырыттылар.

Семенова Евдокия Павловна, музей үлэһитэ