Кулун тутар 5 күнэ – Өрөспүүбүлүкэҕэ норуот маастарын күнэ бэлиэтэнэр. Бу күн Былатыан Ойуунускай аатынан Судаарыстыбаннас түмэлигэр дьарыктанар “Ситим” түмсүү кыттыылаахтара  “Илии сылааһынан” диэн ааттаах быыстапканы бэйэлэрин ис санааларыттан көрдөрүүгэ аҕаллылар.

Түмэл үлэһитэ Дария Кириллина бэлиэтээбитинэн, бу түмсүүнү  2017 сыллаахха норуот маастара Лидия Богатырева тэрийбитэ, түмэлтэн салайааччынан Марианна Барахова үлэлэспитэ. Бу сылларга түмэлгэ элбэх оҥоһугу оҥорон бэлэхтээн фонданы хаҥатыыга улаханнык көмөлөстүлэр. Маны сэргэ ситимнэр Баайаҕаҕа Моҕол ураһа тутулларыгар туоһу тигиигэ эмиэ иистэнэн көмөлөспүттэрэ.  Билигин бу түмсүүнү түмэлтэн Надежда Гоголева иилиир-саҕалыыр, салайар.  Соторутааҕыта “Манчаары оонньуутун” көрсө 100 м. ситии быаны баайан олохтоох дьаһалтаҕа туттарбыттара. Инникитин ситимнэр үлэлиир, саҥаны оҥорор, айар-тутар былааннара киэҥ.

С. Халгаева, Д. Кириллина хаартыскалара