Саха Өрөспүүбүлүкэтин Судаарыстыбаннаһын күнүн көрсө киэн туттар биир дойдулаахпыт, Саха Өрөспүүбүлүкэтин төрүттэспит уһуллуччулаах государственнай уонна политическай деятель Максим Кирович Аммосов пааматынньыгар тыыннаах сибэкки дьөрбөтүн ууруу тэрээһинэ уонна общественность мунньаҕа ыытылынна.

Тэрээһиҥҥэ СӨ Правительствотын председателин солбуйааччы Георгий Михайлович Степанов, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Павлович Атласов, Нам улууһун баһылыга Юрий Иннокентьевич Слепцов, Хатырык нэһилиэгин баһылыга Артур Егорович Ноговицын, норуот депутаттара, нэһилиэктэр баһылыктара, улуус ыччата, оскуола оҕолоро кыттыыны ыллылар.

М.К. Аммосов аатынан Судаарыстыбаннас историятын музейыгар общественность мунньаҕар президиумҥа олорбут салайааччылар сахабыт чулуу уолаттара Судаарыстыбаннаһы хайдах турууласпыттарын, автономияны ылыы, суверенитеты ситиһии Сахабыт сирин норуоттарын олоҕор, дьылҕаларыгар туох үтүө сабыдыаллааҕын, Судаарыстыбаннаһы бөҕөргөтүүгэ, чулуу дьоммут ааттарын-суолларын үйэтитиигэ республика, улуус таһымыгар туох үлэ ыытылла турарын туһунан уонна бар дьоннорун эҕэрдэлээн тыл эттилэр. Бу сүдү суолталаах күн чуолаан ыччат дьоҥҥо туһуланарын, кинилэр төрөөбүт дойдубутугар бэриниилээх буола улааталларын туһугар уһуйаантан, оскуолаттан саҕалаан иитэн-үөрэтэн таһаарыахтаахпытын, ол туһугар бары бииргэ сомоҕолоһон үлэни-үөрэҕи өрө тутан улууспутун, республикабытын, дойдубутун инники күөҥҥэ таһааран иннибит диэки эрэллээхтик хардыылыахтаахпытын тоһоҕолоон эттилэр.

Үөрүүлээх тэрээһиҥҥэ саастарын сиппит оскуола оҕолоругар дойду толору бырааптаах гражданнара буолбуттарын туоһулуур паспорт туттардылар.