Олоҥхо декадатын чэрчитинэн республикабыт кырдьаҕас, бас-көс музейыгар Ем. Ярославскай аатынан Хотугу омуктар устуоруйаларын уонна култуураларын судаарыстыбаннай холбоһуктаах Саха музейыгар “Олоҥхо алыптаах эйгэтигэр” тэрээһин буолан ааста.

Ол курдук бүгүн саха балаҕаныгар, көмүлүөк оһох тула оллоонноон олорон “Олоҥхо баттл” быйылгы бырайыак муҥутуур кыайыылааҕа Никита Аянитов Кирилл Никифоров – Лөкөчөөн “Хабытта Бэргэн” олоҥхотуттан быһа тардан толордо, олоҥхо уобарастарын чаҕылхайдык арыйда. А.Д. Макарова аатынан культура уонна искусство коллеһын устудьуоннара уонна ыҥырыылаах ыалдьыттар олоҥхону сэргии, сэҥээрэ иһиттилэр.

“Олоҥхо – саха норуотун энциклопедията, бары күндүтэ мустубут музейа. Саха фольклорун бары жанрдарын синтеһэ, киһи билэр бары поэтическай ньыматын сиэркилэтэ” – Улуу Суруйааччыбыт, Ытык Киһибит Д.К. Сивцев-Суорун Омоллоон бэргэн этиитэ.