Бүгүн от ыйын 8 күнүгэр Ытык Таатта сиригэр, Ытык-Күөлгэ, А.Е. Турнин аатынан спорт дыбарыаһын киэн уораҕайыгар күрэс төрүт көрүҥнэригэр Манчаары XXII оонньууларын кыттыылаахтарыгар уонна ыалдьыттарыгар анаан Ем. Ярославскай аатынан Саха музейын быыстапката арылынна.

Быыстапка Саха республикатыгар спорт хамсааһынын, сайдыытын сырдатар. Ол курдук Манчаары оонньууларын төрүттээбит, сүүрбэччэ сыл салайбыт Афанасий Егорович Алексеев уонна улуу тренер Дмитрий Петрович Коркин тус олохторо-ситиһиилэрэ, Саха сирин бастакы олимпийскай чемпионун Роман Дмитриев мэтээлин копията, «Азия оҕолоро» норуоттар икки ардыларынааҕы оонньууларын материаллара дьон-сэргэ көрүүтүгэр турдулар. Ону таһынан Амма улууһун Николай Захаров-Сахаачча түмэлиттэн сэбиэскэй кэминээҕи спортивнай инвентарьдары быыстапкаҕа көрүөххэ сөп.