Бу сыл ахсынньы 25 күнүгэр П.А. Ойуунускай аатынан Судаарыстыбаннас музейыгар Ил Түмэн спикерэ А.И. Еремеев, СӨ култуураҕа министрэ А.И. Ноев, бас музейбыт салайааччыта Н.Д. Бугаев, капитальнай өрөмүөн бэдэрээччитэ “Инжиниринг” ПДД салайааччыта Гаврил Платонов, Таатта улууһун баһылыга А.И. Бурцев, улуустааҕы норуот Айымньытын дьиэтин салайааччыта И.А. Сивцева уо.д.а. кэлэн өрөмүөн бастакы түһүмэх үлэтин көрдүлэр, рабочай мунньах ыытылынна.
Кэнники сылларга музейбыт турар сирэ хамсаан өрөмүөн ыытыллара олус наадалаах буолбута. Икки сылтан бэттэх өрөмүөн ыытарга туруорсуулар, Алексей Ильич тус бэйэтэ иккитэ кэлэн көрөн, мунньахтаан барбыта. Бу иннинэ маннык улахан өрөмүөн, Өрөспүүбүлүкэ 100 сылын көрсө, Нам улууһун Хатырыгар баар М.К. Аммосов аатынан Судаарыстыбаннас музейыгар ыытыллыбыта. Онон былаан быһыытынан Судаарыстыбаннас музейдарыгар өрөмүөн үлэтэ ыытыллыбытыттан Өрөспүүбүлүкэбит салайааччыларыгар барҕа махталбытын тиэрдэбит.
Билигин музейбытыгар иккис түһүмэх улахан үлэ – реэкспозиция үлэтэ ыытыллыаҕа. Бу туһааннаах үлэҕэ А.И. Еремеев кэлэр сыл бюджетыгар 11 мөл. 700 тыһ солк көрүллүбүтүн иһитиннэрдэ! Бу билиҥҥи балаһыанньаҕа, үп-харчы уустук кэмигэр Былатыан Ойуунускай сырдык аатын үйэтитэргэ, олох хаамыытынан көрөөччүлэр ирдэбиллэригэр эппиэттиир, аныгы технологияны көмөлөһүннэрэн үлэҕэ туттарга, туһанарга далааһыннаах хардыы оҥоһулунна!
Рабочай мунньах кэмигэр музей сэбиэдиссэйэ Михаил Аржаков реэкспозиция былаанын көрдөрдө, сиһилии кэпсээтэ. Специалистар Анна Борисова, Светлана Халгаева сылы түмүктүүр “Былатыан Ойуунускай сирэм күөх кырдалыгар” стационарнай быыстапканы, бу сайын Тааттаҕа ыытыллыбыт “Манчаары оонньуутугар” “Сахабулт” концерн Былатыан Ойуунускай 1924 сыллаахха РКП(б) үһүс уобаластааҕы конференциятыгар кэтэн түспүт хаартыскатынан сирдэтэн Былатыан кэппит этэрбэһин үтүгүннэрэн тигэн бэлэх ууммуттарын көрдөрүүгэ туруорбуттарын сырдаттылар.