От ыйын 26 күнүгэр Дьокуускай куораттан “Дьахталлар Лигалара” общественнай хамсааһын түмсүүтэ ыалдьыттаата. Бу түмсүүгэ куорат 15 уокуругуттан олоххо көхтөөх ийэлэр киирэн, баҕа санааларынан айа-тута, олох оргуйар үөһүгэр сылдьаллар. Үгүстэрэ элбэх оҕолоох ийэлэр, бэйэлэрин үлэлэрин таһынан олорор тиэргэннэрэ түмсүүлээх буоларыгар, саҥаны-сонуну киллэрэргэ ылсаллар.

Түмсүү председателинэн Татьяна Дмитриевна Егорова үлэлиир. Куорат бары общественнай үлэтигэр кыттан, олох чэпчииригэр, бойобуой дьайыыга сылдьар биир дойдулаахтарбытыгар араас көмөнү оҥорон уо.д.а. тэрээһиннэргэ кытталлар.
Ыалдьыттар кырдьаҕас Чөркөөххө үктэнээт даҕаны аһаҕас халлаан анныгар турар музейга, Былатыан Ойуунускай киинэ түспүт төрөөбүт алааһыгар дуоһуйа сырыттылар. Сарсыардаттан этиҥнээх ардах түһэн Муҥха Дэлбэрийбит алааһыгар аараттан сатыылаан, тыа сирин чэбдик салгынынан сайа тыынан сайыҥҥы умнуллубат күн тосхойдо. Салгыы Чөркөөх музейын көрөн “киһи бу ытык, дириҥ историялаах сиргэ дьиэ кэргэнин кытта ыксаабакка кэлиэн сөп эбит”, – диэн санааларын эттилэр. Манна даҕатан эттэххэ, Чөркөөх орто оскуолатыгар физика учууталынан үлэлээбит, кэлин “Таатта” совхоз комскомунан, оройуон комсомольскай тэрилтэтигэр, билигин куорат биир улахан уокуругун общественницата Вера Аммосова кэлбит. Вера Прокопьевна общественнай үлэтэ үрдүктүк сыаналанан “Гражданскай килбиэн” бэлиэнэн наҕараадаламмыта элбэҕи этэр.
Киэһэтин Ньукуола таҥара дьиэтигэр нэһилиэк общественай түмсүүлэрин кытары көрүстүлэр. Хардарыта уопуттарын кытта үллэһиннилэр. Икки өттүттэн общественниктар мустан олус өрө көтөҕүллэн, санааларын сайа этэн тарҕастылар. Нэһилиэкпитин киэргэтэр “Далбар” түмсүү ааспыт үйэҕэ олорон ааспыт баай Оруоһуттар мааны хотуттарын курдук үтүгүннэрэн тиктэрбит таҥастарын кэтэн кэлэн дефиле көрдөрөн, “хаама сылдьар хартыына” буолан сөхтөрдүлэр. Куораттан кэлбит ыалдьыттарбыт сөҕөн, тутан-хабан, ватсапка көрөр дьоммутун дьэ илэ көрдүбүт диэн астыннылар.

Тэрээһиҥҥэ Октябрьскай нэһилиэк баһылыга А.П. Семенов кыттыыны ылла, педагогическай үлэ бэтэрээнэ, билигин Дьокуускай куорат национальнай гимназиятыгар үлэлиир Н.П. Жерготова иилээн-саҕалаан ыытта.

С. Халгаева

Тэрээһин түгэннэриттэн