Сардаана  Боякова салайааччылаах Институт үлэһиттэрин, Казаньтан,  Хакасияттан, ыраах сирдэртэн тиийэ кэлбит учуонай дьону, Нам, Мэӊэ-Хаӊалас, Чурапчы улуустарын бэрэстэбиитэллэрин  Ойуунускай дойдута нуһараӊ көмүс дуйга сууланан ахтыбыттыы көрүстэ.

Ойуунускай «бу дойдуга хаалар дьон харыстааӊ» диэн кэриэһин толорон Суорун Омоллоон норуот күүһүнэн туттарбыт Чөркөөх түмэлигэр сайбаччы хааман  чаӄаан салгынынан сайа тыынан Саха сиригэр көскө кэлэн олорбут сыылынайдар наукаӄа хаалларбыт нэһилиэстибэлэрин илэ-бодо көрөн астыннылар, «хараӊаӄа сырдыгы сахпыт судаарыскайдары» кытары  хаартыскаӄа түстүлэр.

Үөрүүлээх тэрээһин кыттыылаахтара Ойуунускай саппыкыта хачыгыраан кэлэн олоӊхону истибит балаӄаныгар олоӊхо иһиттилэр, манна Тыл уонна култуура институтун үлэһиттэрэ  Олоӊхо балаӄаныгар көмөлөрүн кэпсиир  хаартысканан быыстапканы көрөн итэӄэйэн үтүөнү оӊорор саӊа санааӄа куустаран долгуйдулар. Моӄол ураһаӄа Чөркөөх нэһилиэгин Далбар хотуттарын көрсөн, ϴксөкүлээх ϴлөксөй   алгыһын түһүлгэтигэр тохтоон алгыс ылан сүгүрүйэн аастылар.

Тааттаӄа Институт күннэрин кыттыылаахтара Ойуунускай алааһыгар кырыымпа ураты тыаһынан  доӄуһуоллатан  дуоһуйа сынньанан  баран «Культурное наследие Якутии: опыт и перспективы сотрудничества науки и муниципалитетов» диэн төгүрүк остуол тула олорон киэӊ далааһыннаах кэскиллээх кэпсэтиини  таһаардылар.

 Изабелла Жерготова, Чөркөөх

Балаӄан ыйын 19 күнэ, 2025 сыл