Бүгүн – модун дойдубут былааҕын күнэ
Быдан дьыллартан, икки үйэҕэ Россияҕа атыы-эргиэн хараабылларыттан саҕалаан киллэрбит үс өҥнөөх былааҕа 1991 сыллаахха атырдьах ыйын 22 күнүгэр дойдубутугар хаттаан эргийбитэ.
“Биһиги былаахпыт – биһиги сомоҕолоһуубут, Аҕа дойдубутугар тапталбыт, эрэлбит, ааспыкка сүгүрүйүүбүт, билиҥҥинэн киэн туттуубут, дойдубут кэлэр кэскилигэр эрэлбит бэлиэтэ”, – диэн Ил Түмэн спикерэ А.И.Еремеев бэйэтин эҕэрдэ тылыгар бэлиэтиир.
Былатыан Ойуунускай аатынан Судаарыстыбаннас музейа билигин улахан өрөмүөҥҥэ сабыллан турар. Ол да буоллар үлэ тохтообокко ыытыллар. Бүгүн Россия былааҕын күнүгэр анаан лекция-сырдатыы оҥорор сыаллаах -соруктаах сарсыардаттан Октябрьскай нэһилиэги көрөр, харыстыыр МПЧ-5 тэрилтэтигэр тиийэн сырдатыы үлэтэ ыытылынна.
МПч-5 тэрилтэҕэ уопсайа 10 киһи үлэлиир. 2008 сыллаахха үлэҕэ киирбитэ, бэйэтэ дьиэлээх-уоттаах, анал баһаарынай массыыналарынан, атын да тэрилинэн толору хааччыллан олорор. Бүгүн дьуһуурустубаҕа караул начальнига Д.П.Ребров уонна суоппар, бэтэрээн үлэһит И.Ф.Ефремов үлэлэрин күнэ. Саахал, иэдээн тахсыбатын туһугар күннэри-түүннэри үлэлии олорор тэрилтэ.
Чөркөөххө биир кырдьаҕас тэрилтэнэн “Аленушка” оҕону сайыннарар киин буолар. Манна өрөмүөн үлэтэ саҕаланан үлэ-хамнас үгэнигэр сылдьаллар. Ол да буоллар бириэмэ анаан үлэһиттэр болҕойон олорон истэн, кэккэ боппуруостары биэрдилэр.
Аһаҕас халлаана анныгар турар Чөркөөх музейыгар ыалдьыттар сылаас күннэри баттаһа илим хотоҕоһунуу субуллаллар. Манна 1913 сыллаахха үлэҕэ киирбит Ньукуола таҥаратын дьиэтин тэлгэһэтин таһыгар Россия былааҕа модун дойдубут кэрэһитэ – кэлбит ыалдьыттары өрө көтөҕүллүү тыыныгар угуйа, бэлиэ күн буоларын көрдөрө, биллэрэ туруорулунна.
С.Халгаева.
Хаартыскаларга: МПЧ-5 караул начальнига Д.П.Ребров уонна суоппар, бэтэрээн үлэһит И.Ф.Ефремов; оҕону сайыннарар “Аленушка” киин үлэһиттэрэ; Чөркөөх музейын тэлгэһэтигэр – Россия былааҕа үрдүккэ, өрө көтөҕүллүүгэ ыҥыра-угуйа турар.