ГБУ РС(Я) «Якутский государственный объединенный музей
истории и культуры народов Севера им. Ем. Ярославского»
ГБУ РС(Я) «Якутский музей»
Таатталар Улуу биир дойдулаахтарыгар сүгүрүйэллэр
11 ноября 2020, 14:22

Сэтинньи 11 күнэ – саха норуотун биир чаҕылхай уолун, бөдөҥ судаарыстыбаннай деятель, айар тыл аҕата П.А.Ойуунускай төрөөбүт күнэ. Бу күн таатталар Дьокуускай куораттан саҕалаан мэҥэ өйдөбүнньүктэригэр сүгүрүйүү сиэрин-туомун ыыттылар.

Былатыан Ойуунускай киинэ түспүт Дэлбэрийбит алааһыгар Чөркөөхтөөҕү музей үлэһиттэрэ тахсан балаҕанын ыраастаан, хаарын күрдьэн, көмүлүөк оһоҕу тигинэччи оттон, саха мааны аһын алаадьы астаан сыт таһааран сырылаттылар. Бу балаҕаҥҥа 127 сыл анараа өттүгэр Саха сирин Судаарыстыбаннаһын төрүттээччилэртэн биирдэстэрэ, киһи киэнэ килбиэннээҕэ, айар тыл илбистээх аартыгын арыйааччы Былатыан Ойуунускай кэллэҕэ.

Улуус киинигэр Ытык Күөлгэ уонна Дэлбэрийбит алааһыгар сүгүрүйүү сиэрэ-туома тэҥинэн ыытылынна. Ытык Күөлгэ улуус баһылыга М.М.Соров, Дэлбэрийбит алааһыгар улуус мунньаҕын бэрэссэдээтэлэ В.А.Охотин, Чөркөөх нэһилиэгин баһылыга А.П.Семенов, Судаарыстыбаннас түмэлин салайааччыта М.Г.Аржаков, музей сотрудниктара, общественность кыттыылаах тэрээһин, мэҥэ өйдөбүнньүккэ тыыннаах сибэкки дьөрбөтүн ууруу тэрилиннэ.

Бу күн П.А.Ойуунускай аатынан Судаарыстыбаннас музейыгар сарсыардаттан оскуола үөрэнээччилэригэр онлайн уруоктар, кылаас чаастара буоллулар. Эбиэттэн киэһэ үс музей: Чөркөөхтөөҕү политическай ссылка, Судаарыстыбаннас историятын уонна Дьокуускай куоракка П.А.Ойуунускай аатынан литературнай музейдара кыттыылаах сэһэргэһии түһүлгэтэ олохтонно, Ытык Күөллээҕи кииннэммит библиотека ыытар аһаҕас конференцията дьону-сэргэни түмэ тарта.

С.Халгаева