Муус устар 12 күнэ, 1961 сыл. Лоп курдук 60 сыл анараа өттүгэр аан дойду радиостанциятын долгунугар киһи аан бастаан куйаарга көппүтүн туһунан иһитиннэрии сарсыардаттан тилийэ сүүрбүтэ. Оччотооҕу Сэбиэскэй Сойуус дьонугар Аҕа дойду Улуу сэриитин кэнниттэн бу иккис норуот барыта өрө туран, уулуссаҕа тахсан бырааһынньыктаабыт өрөгөй күнэ этэ.

Дьыл-хонук төһө да субуллан аастар ис киирбэх мичээрдээх Юрий Гагарин космонавтика салаатын кытта бииргэ алтыһар. Космос уонна Гагарин биир өйдөбүлү биэрэллэр. Быйыл киһи аан бастаан киҥкиниир киэҥ куйаарга көппүтэ 60 сыла киэҥник бэлиэтэннэ.

Бу күннэргэ П.А.Ойуунускай аатынан Судаарыстыбаннас түмэлин үлэһиттэрин көҕүлээһининэн Чөркөөх орто окуолатын алын сүһүөх кылааһын үөрэнээччилэригэр уонна «Аленушка» уһуйаан улахан бөлөҕүн иитиллээччилэригэр «Ойуунускай планетата» диэн уруһуй күрэхтэһиитэ ыытылынна.

5 сыл балаҕан ыйын 19 күнүгэр Крым Астрофизическэй Обсерваторията саҥа планетаны арыйбыта. Бу планета норуоттар икки ардыларынааҕы астрономическай каталогка 16407 нүөмэринэн киирбитэ. Саамай үөрүүлээҕэ диэн саҥа арыллыбыт планетаҕа Саха сирин судаарыстыбатын олохтообут бөдөҥ салайааччы, учуонай, саха сэбиэскэй литературатын төрүттээбит, философ П.А.Ойуунускай аата иҥэриллибитэ буолбута.

Күрэхтэһиибитигэр киирдэххэ, уопсайа 74 үлэ киирэн, дьүүллүүр сүбэ кыайыылаахтары талла. Бырайыак автора Марианна Барахова: «Маннык куонкурустар оҕо толкуйдуур, уруһуйдуур дьоҕурун сайыннарарга туһуланаллар. Иккис өттүнэн, судаарыстыбаннай деятель, биир дойдулаахпыт П.А.Ойуунускай 110 сылыгар ааттаммыт «Ойуунускай планетатын» туһунан эбии билэллэригэр уонна киһи куйаарга тахсыбыта 60 сылыгар анаан тэрийдибит. Оҕолор уруһуйдарын туһунан эттэххэ, аныгы үйэ технологията оҕо сайдарыгар кини бэйэтин көрүүтүн көрөөччүгэ тиэрдэригэр тирэх буолар эбит. Сайдыы сиэринэн син биир рекламаттан көрөн үтүктээһин элбэх, ол быыһыгар авторскай үлэлэр эмиэ көстөллөр. Үтүктээһин баар буолуохтаах, тоҕо диэтэххэ оҕо көрөн үөрэнэр. – диэн бэлиэтээтэ.

«Ойуунускай планетатын» уруһуйдаабыт бастыҥ үлэлэр икки группанан наарданан, түмүктэр маннык буоллулар: бастакы бөлөххө, кыра саастаахтарга «Аленушка» уһуйаантан Мичийэ Прохорова, Амелия Никитина, Алеша Степанов, иккис группаҕа алын сүһүөх үөрэнээччилэрэ Венера Федосеева, Женя Слепцова, Аксиния Жегусова үлэлэрэ биһирэбил миэстэҕэ тигистилэр. Бары кыттыбыт оҕолорго сертификат, биһирэммиттэргэ «Диплом» уонна минньигэс кэмпиэттэр туттарылыннылар. Онон бу күн хас биирдии оҕо «Ойуунускай планетатын» бэйэтигэр арыйан, саҥаны билэн-көрөн тарҕастылар.

Светлана Халгаева