ГБУ РС(Я) «Якутский государственный объединенный музей
истории и культуры народов Севера им. Ем. Ярославского»
ГБУ РС(Я) «Якутский музей»
Судаарыстыбаннас дьиэтигэр олоҥхо дьиэрэйэр
30 ноября 2021, 11:36

Бу күннэргэ өрөспүүбүлүкэ үрдүнэн олоҥхо декадата араас хайысханан ыытыллар. Аныгы кэм ирдэбилинэн куйаар ситимин балачча туһанан тэрээһиннэр көхтөөхтүк  бараллар.

 Ол курдук, сэтинньи 29 күнүгэр Чөркөөххө П.А.Ойуунускай аатынан СӨ Судаарыстыбаннаһын музейыгар «Аал Луук Мас – олоҥхо сүрүн тутула» диэн тэрээһини улуустааҕы «Былатыан ыччаттара» хамсааһын куйаар ситимин нөҥүө ыыттылар. Тэрийээччилэринэн Н.Н.Туласынов аатынан норуот айымньытын дьиэтэ, П.В.Толстяков аатынан Чөркөөхтөөҕү норуот тыйаатыра буоллулар.

Бу тэрээһин сүрүн сыалынан-соругунан Таатта улууһун олоҥхону толорооччуларын кытта сүбэ-саргы түһүлгэтин олохтооһун, үүнэр көлүөнэҕэ үөрэтии буолла. Тэрээһиҥҥэ өрөспүүбүлүкэҕэ биллэр олоҥхону  толорооччулар Людмила Цой, Афанасий Попов, Розалия Докторова, Кэнчээри Собакина кытыннылар.

Олоҥхо – норуот уус уран тылынан айымньытын сүдү чыпчаала буолар. Норуот уола Былатыан Ойуунускай  олоҥхону өлбөт-сүппэт үөстээри, оччотооҕу кэмҥэ (1930-с сылларга) Чөркөөххө бырааба дьиэтигэр улуус бастыҥ олоҥхоһуттарын мунньан үс түүннээх күнү быһа олоҥхолотон «Дьулуруйар Ньургун Боотур», билигин ЮНЕСКО-ҕа материальнайа суох баай-дуолунан биллибит айымньыны суруйан хаалларбыта. Бэл, ити олоҥхо тылын суруйарыгар, айар тыл илбиһэ киирэн  аһыы олорон кытта ыллыы олороро диэн ахталлар. Баараҕай аал луук мастыы суруйан, чочуйан  норуотугар бастыҥ, туохха да кэмнэммэт үйэлэргэ өлбөөдүйбэт тыл  баайын суруйан, айан хааллардаҕа.

Манна даҕатан эттэххэ, Олоҥхо декадатын түмүктүүр тэрээһиҥҥэ, ол эбэтэр ахсынньы 5 күнүгэр Саха АССР төрүттэммитэ 100 сылын көрсө «Былатыан ыччаттара» хамсааһын тэрийиитинэн «Дьулуруйар Ньургун Боотур» олоҥхо бастакы ырыатын өрөспүүбүлүкэ ыччаттара  ааҕыахтара. Бу ыччаттар олоҥхону оллоонноон олорон, өрөөбүт уостарын өһүлэн ааҕыыларын «Тааттатааҕы норуот айар дьиэтин ютуб каналыгар» киирэн көрүөххэ сөп.

С.ХАЛГАЕВА