Саха биллиилээх судаарыстыбаннай уонна бэлитиичэскэй диэйэтэлэ И.Н.Барахов төрөөбүт дойдутугар Харбалаахха Саха Өрөспүүбүлүкэтин Судаарыстыбаннаһын күнүн бэлиэтиир өрөгөйдөөх миитин буолла. Тэрээһиҥҥэ кытыннылар Ил Түмэн Судаарыстыбаннай мунньах депутата М.С.Филиппова, «Үөһээ Бүлүү улууһа (оройуона)» МО баһылыга В.С.Поскачин, улуус мунньаҕын Сэбиэтин бэрэссэдээтэлэ С.А.Михалев уонна улууспут олохтоохторо.
Улуус баһылыга В.С.Поскачин эҕэрдэ тылыгар СӨ бастакы Президенин М.Е.Николаев суверенитет ылыныытыгар сүҥкэн өҥөтүн бэлиэтээтэ. Саха Аптаныамыйатын төрүттэспит И.Н.Барахов аата М.К.Аммосов, П.А.Ойуунускай аатын кытта тэҥҥэ ааттыылларыттан, Саха тыйаатыра «Ол биир күн» диэн испэктээҕин туруорбуттарыттан олус үөрэрин, киэн туттарын туһунан эттэ.
Ил Түмэн депутата М.С.Филиппова Декларация ылыныллыбыт күнүнэн эҕэрдэлээтэ. Балаҕан ыйын 27 күнэ Саха сирин историятыгар улахан суолтатын, парламентаризм сайдарыгар олук уурбутун туһунан кэпсээтэ. Харбалаах нэһилиэгэр, буолан ааспыт быыбарга, 25 эрэ саастаах нэһилиэк депутата талыллыбыта эдэр ыччакка эрэл улаханын бэлиэтээтэ.
И.Н.Барахов аатынан 1№-х оскуола үөрэнээччитэ В.Черкашин Судаарыстыбаннас күнүн суолтатын тиэрдэр дириҥ ис хоһоонноох эҕэрдэ тыл эттэ.
Түмэл ыалдьыттарыгар «Уолан» уолаттар түмсүүлэрэ экскурсия ыытта, биир дойдулаахтарын И.Н.Барахов олоҕун, государственнай үлэтин сиһилии кэпсээтилэр. Тэрээһин кыттыылаахтара саха биллиилээх судаарыстыбаннай уонна бэлитиичэскэй диэйэтэллэр М.К.Аммосовка, П.Ойууунскайга аналлаах быыстапканы көрдүлэр.
Үгэс курдук бу күн «Сахам сирин, Үөһээ Бүлүүбүн таптыыбын!» диэн төрөөбүт дойдубут, улуусспут туһунан ырыалардаах кэнсиэр буолла. Кэнсиэркэ саха саарыннарын аатын сүгэр Харбалаах, 1№-х, 2№-х, 3№-х, 4№-х, лицей-интернат үөрэнээччилэрэ көхтөөхтүк кытыннылар.

И.Н.Барахов аатынан
СӨ Судаарыстыбаннаһын түмэлэ