Бу дьыл кулун тутар 10-11 күннэригэр, ытык Таатта сиригэр чуолаан Чөркөөхтөөҕү уонна Хадаайы «Таатта» түмэллэригэр Хотугулуу-Илиҥҥи университет, Оксфорд университетын профессора, философскай наука доктора Сотери Эндрю Мусалимас үөрэтэр студеннарын кытары ыалдьыттаан бардылар. Профессор Мусалимас Чөркөөххө бу үһүс кэлиитэ буолар.

Бастакы күн Чөркөөх түмэлигэр сэбиэдиссэй Николай Ефимович Попов, Чөркөөх орто оскуолатын директора Роман Владиславович Обоюкин, түмэл үлэһиттэрэ научнай сотрудник Изабелла Яковлевна Жерготова, Оксана Владимировна Жерготова  көрсөннөр, истиҥ билсиһии, кэпсэтиһии буолла. Араас омук студеннара кэлэн биһиги Сахабыт сиригэр үрдүк үөрэх кыһатыгар үөрэнэ сылдьаллар эбит: Вьетнамтан, Кытайтан, Таджикистантан, Намибияттан (Африка) уо.д.а. Ол курдук сыаллара соруктара биир дойдулаахтарбыт сырдык кэриэстэригэр, уһулуччулаах государственнай деятель, суруйааччы, учуонай, бөлүһүөк Платон Алексеевич Ойуунускай уонна Саха Республикатын норуодунай суруйааччыта, Социалистическай Үлэ Геройа, биллэр общественнай деятель Дмитрий Кононович Сивцев – Суорун Омоллоон төрөөбүт-үөскээбит сирдэригэр сылдьыы, эдэр ыччат билиитэ-көрүүтэ хаҥыырыгар, үөрэхтэригэр матырыйаал быһыытынан эбии саҥа көрүү, көрдөөһүн буолар. Бу күн Попов Н.Е. ыалдьыттары Суорун Омоллоон сайылыгынан, көмүс уҥуоҕар «Чочуобунаҕа», Былатыан Ойуунускай төрөөбүт алааһыгар сырытыннаран, эдэр дьоҥҥо умнуллубат түгэн, история биир хатыламмат күнүнэн буолла. Чөркөөххө түмэлгэ уонна оскуоланан хонон сынньанан туран, иккис күн сарсыарда 9 чаастан Жерготова О.В. көрсөн Чөркөөх «Саха сиринээҕи политссылкатын» түмэлигэр экскурия ыытта. Сонурҕаан, тымныыны-тымныы диэбэккэ үөрэн-көтөн көрдүлэр-иһиттилэр. Онтон Ытык-Күөл Хадаайы «Таатта» түмэлигэр айаннаатылар. Манна Попов Н.Е., Таппыров В.Д.- «Таатта» түмэл дириэктэрэ, научнай сотрудник Туласынова М.Н. уо.д.а. көрсөн умнуллубат түгэни бэлэхтээтилэр.

Түмүгэр Жерготова И.Я. түмэл аатыттан өйдөбүнньүк кинигэ бэлэх уунна, Попов Н.Е. – түмэл сэбиэдиссэйэ  «Чудо Музей» брошюра-кинигэни тылбаастыырга көрдөһөн профессор Мусалимаска туттарда.

Маннык инникилээх хайысханан үлэлэһэр профессорга Сотери Эндрю Мусалимаска үлэтигэр ситиһиини, эдэр дьоҥҥо таһаарыылаах үөрэҕи, үлэни баҕара хааллыбыт Түмэл үлэһиттэрэ. Инникитин да үөрэх кыһаларын кытары ситим быстыбатын.

Жерготова О.В.