ГБУ РС(Я) «Якутский государственный объединенный музей
истории и культуры народов Севера им. Ем. Ярославского»
ГБУ РС(Я) «Якутский музей»
Ойуунускай өркөн өйө уонна билиҥҥи кэм
12 февраля 2021, 16:44

Бу сыл олунньу 12 күнүгэр П.А. Ойуунускай аатынан Судаарыстыбаннас түмэлигэр «Ойуунускай өркөн өйө уонна билиҥҥи кэм» диэн ааттаах Ийэ тыл, сурук-бичик күнүгэр аналлаах төгүрүк остуол ыытылынна.

Билиҥҥи балаһыанньа ирдэбилинэн төгүрүк остуол зуум нөҥүө ыытылынна. Тэрээһин үөрүүлээх аһыллыытыгар Чөркөөх орто оскуолатын 7-с кылааһын үөрэнээччилэрэ, олохтоох «Иэйии» хоһоонньуттар түмсүүлэрэ хоһоон ааҕыыларынан саҕаланна.

Аһаҕас кэпсэтии саҕаланыытыгар зуум нөҥүө улуус аҕа баһылыга М.М.Соров, “Чолбон” сурунаал кылаабынай редактора Г.Г.Андросов, П.А.Ойуунускай аатынан гос. бириэмийэ лауреата, суруйааччы Е.В.Слепцова-Куорсуннаах эҕэрдэлээтилэр.

Сүрүн иһитиннэриилэри Государственность музейын сэбиэдиссэйэ М.Г.Аржаков: “П.А.Ойуунускай литературнай тыл уонна уонна сурук-бичик үөскээһинигэр оруола” , “Хроника, факты, события” брошюраны таһаарыы суолтата” И.А.Аргунов аатынан Тааттатааҕы кииннэммит библиотека библиограба Т.Д.Бочорукова, “Ойуунускай уонна мин нэһилиэгим” бырайыак тула Чөркөөхтөөҕү политсыылка музейын специалиһа И.Я. Жерготова оҥордулар.

Саха Автономиятын, судаарыстыбаннаһын олохтоспут, төрөөбүт төрүт тылбыт сайдар кэскилин, сокуоннарын торумнаспыт , наука хараҕынан анаарбыт бастакы тыл учуонайа П.А.Ойуунускай аатынан музейга киэҥ кэскиллээх кэпсэтии, салгыы ханнык хайысханан, кини нэһилиэстибэтин үйэтитэргэ үлэни ыытыыга туһуланна.

Кэпсэтиини Тааттатааҕы норуот айымньытын дьиэтин салайааччыта Г.Г.Вырдылин иилээн-саҕалаан ыытта.

С.Халгаева