ГБУ РС(Я) «Якутский государственный объединенный музей
истории и культуры народов Севера им. Ем. Ярославского»
ГБУ РС(Я) «Якутский музей»
Николай Ефимович 75 сааһын туолбут кэрэ-бэлиэ күнүнэн эҕэрдэ!
20 ноября 2020, 17:26

Ытыктабыллаах Николай Ефимович!

Ем. Ярославскай аатынан Хотугу норуоттар историяларын уонна культураларын государственнай холбоһуктаах музейын салалтатын, коллективын, бииргэ үлэлиир үөлээннээхтэрин ааттарыттан 75 сааскын туолбут кэрэ-бэлиэ үбүлүөйгүнэн ис сүрэхпититтэн итиитик-истиҥник эҕэрдэлиибит!
Эйигин Улуу Суорун Омоллоон идеятын олоххо киллэрбит, салгыы сайыннарбыт, саха норуотун тарбахха баттанар кыраайы үөрэтээччитинэн, биллиилээх общественнай деятелинэн, дьиҥнээх патриотунан, талааннаах салайааччынан, тутаах киһибитинэн сыаналыыбыт, дириҥник ытыктыыбыт!
Сүҥкэннээх үлэҕинэн-хамнаскынан, киэҥ билиигинэн-көрүүгүнэн, тобуллаҕас толкуйгунан, бигэ тылгынан-өскүнэн республикабытыгар эрэ буолбакка, аар-саарга киэҥник биллибит – Чөркөөхтөөҕү политсыылка уонна П.А.Ойуунускай аатынан Саха Республикатын государственноһын музейдара сайдалларыгар, үлэлэрэ-хамнастара айымньылаах, таһаарыылаах, инникитэ кэскиллээх буолалларыгар, дьон-сэргэ, оҕо-аймах таптаан, сэргээн сылдьарыгар үйэлээҕи оҥоро, сүдү кылааты киллэрсэ, маны таһынан история пааматынньыктарын үйэтитиигэ үгүс үлэни ыыта сылдьаҕын.
Саха норуотун баай историятын уонна культуратын чинчийэн, киэҥник тарҕатан, республика музейдара сайдыыларыгар бэйэҥ кылааккын киллэрсэн, кэнэҕэски ыччакка, үүнэр көлүөнэҕэ тириэрдэн, бу курдук айымньылаахтык, таһаарыылаахтык үлэлии сырыт.
Тус бэйэҕэр, чугас дьоҥҥор, алаһа дьиэҕэр үгүс үөрүү, дьол тосхойо турдун диэн үтүө санаа аргыстаах алгыспытын аныыбыт!