Быйылгы сылбыт былааннаах үлэбитигэр элбэх уларытыыны киллэрдэ. Үгүс быыстапкаларбыт, тэрээһиннэрбит инстаграм нөҥүө ыытылынна, музей ю-туб ханаал арынна. Сыл саҕаланыытыгар государственнай уонна общественнай деятель М.Г.Потапова-Габышева төрөөбүтэ 120 сылыгар аналлаах быыстапкалары история уонна этнография музейыгар (директор Сыбахов П.А.), улуус оскуолаларыгар туруортаабыппыт. Үөһээ Бүлүү улууһун ыччатын отделын (начальник Тимофеева П.А.) кытта ыччаттарга, оскуола оҕолоругар үөрэх салаатын (начальник Борбуев С.О.) кытта кыттыһан өй күрэҕин ыыппыппыт. Бүлүү улууһун Халбаакы орто оскуолатыгар государственнай уонна политическай деятель И.Н.Барахов, норуот суруйааччыта Н.Якутскай туһунан быыстапка көрдөрбүппүтүн таһынан кинилэр олохторун туһунан билиһиннэрбиппит.

Харбалаах модельнай библиотекатын кытта (сэбиэдиссэй Николаева Р.А.) мэлдьи ыытыллар бырайыактарбыт үгүс темаларга ыытылыннылар: Брест кириэппэһэ, сахалартан Сэбиэскэй Сойуус Дьоруойдара, разведчиктар, сапердар диэн кимнээҕий уо.д.а.

Аан дойдутааҕы музей күнүн бэлиэтиирбитигэр “Мы-черные копатели” диэн тэрээһиммитин иккис төгүлүн ыыттыбыт. Олохтоохтор олус күүтэр тэрээһиннэригэр кубулуйан эрэр.
Үгэс курдук Арассыыйа былааҕын күнүгэр кырачаан музей көрөөччүлэрэ аспаалга уруһуйдаатылар, уолаттар алаадьы астыырга үөрэннилэр.
Өрөспүүбүлүкэ уонна Судаарыстыбаннас күннэрин, И.Н.Барахов төрөөбүт күнүн үрдүк таһымнаахтык ыыттыбыт.
Инстаграм сирэйбитигэр, ю-туб ханаалбытыгар музей араас экспонаттарын кэпсиир лекциялар, онлайн – быыстапкалар баалларын киирэн көрүөххүтүн сөп.
Балаҕан ыйыгар И.Н.Барахов төрөөбүт алааһыгар, Үчүгэй Бэрэтигэр, мэҥэ өйдөбүнньүк тааһы туруордубут.

Музейнай фонда хаҥыырыгар экспедицияларга сырыттыбыт. Дьон-сэргэ үгүс малларын босхо музейга бэлэхтээтилэр.
333 музейнай предмет Государственнай каталокка киирдэ. Бу үлэни сүрүннээн музей хранителэ Тоскина С.А. ыытта.

Е.П. Семенова, И.Н.Барахов аатынан музей үлэһитэ