Балаҕан ыйын 27 күнэ Судаарыстыбаннас күнүн бэлиэтии саха уһулуччулаах государственнай уонна бэлитиичэскэй диэйэтэл И.Н.Барахов мэҥэ тааһыгар сибэкки дьөрбөтүн уурдулар – СӨ транспорт уонна суол хаһаайыстыбатын миниистирэ Владимир  Михайлович Сивцев, «Үөһээ Бүлүү улууһа”  муниципальнай оройуон баһылыга Владимир Семенович Поскачин,  «Үөһээ Бүлүү улууһа”  муниципальнай оройуон депутаттарын сэбиэтин председателэ  Николаев Николай Николаевич, “Харбалаах нэһилиэгэ” МТ баһылыга Платонов Константин Данилович, Харбалаах нэһилиэгин уонна улууспут олохтоохторо. Бэлиэтээн эттэххэ, В.М.Сивцев И.Н.Барахов 125 сааһын бэлиэтиир үбүлүөйүнэй хамыыһыйа бэрэссэдээтэлин солбуйааччыта. Номнуо хамыыһыйа үлэтин саҕалаабытын билиһиннэрдэ. Куорат биир уулуссатыгар И.Барахов аатын иҥэрэрэгэ, араас тутуу барар былаанын эттэ.

Бу күн  РФ иитэр үлэтин уонна үөрэхтээһинин бочуоттаах үлэһитин аатын улуус үөрэҕин иитэр уонна уопсай үлэҕэ начальнигы солбуйааччы Платонов Н.П., доруобуйа харыстабылын туйгуна бэлиэнэн Харбалаах ФАП фельдшерэ Андреева А.М., СӨ үөрэҕириитин туйгуна “Тугутчаан” оҕо сайдар кинин иитээччитэ Данилова В.В. наҕараадаланнылар.

Үгэс курдук И.Н.Барахов мэҥэ тааһыгар сүгүрүйүүнү СӨ култууратын туйгуна Анна Дмитриева-Иванова “Бараахап туһунан ырыатын” ыллаан түмүктээтэ.

Мантан салгыы И.Н.Барахов төрөөбүт  Үчүгэй Бэрэтэ алааска бэлиэ сурук туоруута буолла. Бу алааска Саха сирин бастакы салайааччыта, саха норуотун туһугар өлөрүн да кэрэйбэтэх, элбэх эндирдээх олоҕу олорон ааспыт И.Н.Барахов күн сирин көрбүтэ. Бэлиэ сурук алааска киирдэххэ киһи эрэ барыта хараҕар хатанар миэстэтигэр туруорулунна.

Семенова Евдокия Павловна, музей үлэһитэ.