Ахсынньы 1 күнүгэр Үөһээ Бүлүү Харбалааҕар “Хаар бырааһынньыга” буолла. Учуутал, улуус хаһыатын корреспондена, лесник, “Чэчир” түмсүү чилиэнэ Руслан Михайлович 85 сааһыгар, уола, хоһоонньут Александр Кривошапкиннарга аналлаах тэрээһин ыытыллыбыта номнуо 3 төгүлэ.

Алаас поэта Руслан Кривошапкин кыһын, таптал туһунан хоһооннорун “Уолан” уолаттар бөлөхтөрө, Н.Якутскай аатынан Харбалаах орто оскуолатын учууталлара, иитиллээччилэрэ, Харбалаахтааҕы сынньалаҥ киинин үлэһиттэрэ, Руслан Михайлович сиэннэрэ аахтылар. “Хаар” диэн Александр Кривошапкин ырыатыгар уһуллубут килииби (оператор А.Адамов) Мичил Кривошапкин, сиэн уол, толоруутугар көрдүбүт. Руслан Михайлович туһунан ахтыыны Светлана Даниловна Копыленко оҥордо.

Сыана табыгастаах киэргэтиитэ, көрөөччүлэр олорор саалалара, үөһэттэн намыыннык түһэр хаар – барыта бүгүҥҥү тэрээһин ааҕыллар айымньылар ис хоһооннорун арыйардыы сөп түбэһэр, өтөр оҕо аймах күүтүүлээх бырааһынньыга Саҥа дьыл чугаһаабытын бэлиэтиир, киһи сүргэтин көтөҕөр.

Бэйээт оҕолоро, сиэннэрэ, хос сиэннэрэ сылын аайы ыытыллар бу тэрээһиҥҥэ көхтөөх кыттыыны ылаллар. Аҕаларын, эһэлэрин аатын үйэтитиигэ нэһилиэги кытта бииргэ үлэлииллэрэ бу кэлэр көлүөнэ ыччакка холобур буолар диэн этэр тоҕоостоох.
Салгыы сүрүн тэрээһин кэннэ “Кыһын Саха сириттэн саҕаланар” улахан түһүлгэ чэрчитинэн биһиэхэ күөх харыйа умайда. Тымныы кырдьаҕас сиэнэ Хаарчаналыын уоттаах-күөстээх сыарҕаҕа олорон кэлэн, эҕэрдэлээтилэр. Руслан Кривошапкин “Харыйа” хоһоонун дорҕооннохтук мустубут дьон-сэргэ аахтылар.

Семенова Евдокия Павловна, И.Н.Барахов музей үлэһитэ