От ыйын 15 – 17 күннэригэр Дьокуускай куораттан эдэр архитектордар экспедициялара аһаҕас халлаан анныгар турар Чөркөөхтөөҕү музей сиригэр палатка-куораты олохтоотулар. Экспедицияны СӨ Ил Дарханын иһинэн үлэлиир куораты тутуу уонна архитектура управлениетын салайааччыта, өрөспүүбүлүкэ кылаабынай архитектора Ирина Дмитриевна Алексеева салайан илдьэ кэлбитэ.

Ирина Дмитриевнаны кытта тэрээһин үөрүүлээхтик аһыллыан иннинэ кэпсэтиигэ: «Биһиги Чөркөөх музейын территориятын навигационнай тиһигин бырайыактааһыҥҥа бастаан күрүөтүн-хаһаатын көрөбүт диэн буолбута. Ол эрээри архитектордар ылыстылар даҕаны аттынааҕы өттүн барытын көрөбүт.  Ол курдук музейга киирдин даҕаны туох-ханан баарын ыйыы (указатели), карта барыта биир сүрүн дизайнҥа олоҕуруохтаах. Фирменнэй истиил диэн тутуһуллуохтаах. Ол аата афишаттан саҕалаан киирэр билиэккэ диэри барытыгар фирменнэй истиил, брендинг баар буолуохтаах. Бу иннинэ Ем. Ярославскай аатынан бас музейга директор Н.Д.Бугаевы кытта көрсөн кэпсэппиппит. Николай Дмитриевич сэргээбитэ уонна филиалларга барытыгар переформатирование наада диэбитэ». Салгыы Ирина Дмитриевна экспедицияҕа кэлбит  эдэр архитектордар талааннаахтарын, тус көрүүлээхтэрин бэлиэтээн эттэ. Архитектордар кыра бырайыактан саҕалаан  2025 сылга Ытык Күөлгэ ыытыллыахтаах Манчаары оонньуутугар Федор Охлопков аатынан паарканы уонна кини аттыгар баар күөл тулатын тупсарыыга ылсыахтаахтар эбит.

Тааттаттан төрүттээх эдэр архитектор Иван Кычкин тула мустан биир дойдулаахтара сүбэлэһэр, айар бөлөх тэриммиттэр. Бу айар экспедицияны эдэрдэр көҕүлээн тэрийбиттэр. Онон миэстэтигэр тахсан үлэ салгыы хайдах барыахтааҕын, архитектуратын көрөн, этэргэ дылы өҥ-дьүһүн талыыта, тутуу дьүөрэлэһиитэ оҥоһуллуо турдаҕа.

Экспедиция үлэтин үөрүүлээх аһыллыытыгар Таатта улууһун баһылыгын тутууга солбуйааччы  Ю.Ю.Халыев, Октябрьскай нэһилиэк баһылыга А.П.Семенов, Чөркөөхтөөҕү политсыылка музейын сэбиэдиссэйэ Н.Е.Попов кыттыыны ыллылар. П.Толстяков аатынан Чөркөөхтөөҕү норуот театрын артыыстара, режиссер Матрена Яковлева, улуу Өксөкүлээх Өлөксөй айымньыларыттан быһа тардан ааҕан ураты эйгэни олохтоотулар. Маны сэргэ нэһилиэк түмсүүлэрэ эмиэ кыттыыны ылан бэйэ бэйэлэрин ситэрсэн, баай ис хоһоонноон биэрдилэр.

Салгынныын айар кут олохсуйбут Таатта эбэ туонатыгар өрөспүүбүлүкэ эдэр архитектордарын сүбэ мунньахтара саҥа тыыны киллэрэн, үлэлэригэр үгүс саҥа сүүрээни, көрүүнү киллэрдин.

С.ХАЛГАЕВА

Хаартыскаларга: Чөркөөх музейыгар Ирина Алексеева кыттыылаах  өрөспүүбүлүкэ эдэр архитектордара; тэрээһин үөрүүлээх аһыллыытыгар; Тааттаттан төрүттээх эдэр архитектор Иван Кычкин уонна музей үлэһитэ Изабелла Жерготова.